హైదరాబాద్ : తెలంగాణలోని జమ్మికుంట పోలీస్ స్టేషన్ అరుదైన ఘనత సాధించింది. దేశంలోని అత్యుత్తమ టాప్ టెన్ పోలీసు స్టేషన్ల జాబితాలో జమ్మికుంట పీస్ కు స్థానం దక్కింది. దేశవ్యాప్తంగా అత్యుత్తమ పోలీస్‌స్టేషన్ల జాబితాను ఈరోజు కేంద్ర హోంశాఖ ప్రకటించింది. తొలి స్థానంలో మ‌ణిపూర్‌లోని నాంగ్‌పోక్ ‌షికమై పోలీస్‌స్టేషన్ నిల‌వ‌గా, ప‌దో స్థానంలో క‌రీంన‌గ‌ర్ జిల్లాలోని జ‌మ్మికుంట పోలీసు స్టేష‌న్ నిలిచింది. దేశ వ్యాప్తంగా 16,671 పోలీస్‌స్టేషన్లకు వివిధ విభాగాల్లో స్టేషన్ల పనితీరు ఆధారంగా ర్యాంకులు ఇవ్వాలని కేంద్ర హోంశాఖ గ‌తంలో నిర్ణ‌యించిన సంగ‌తి తెలిసిందే. ఆ మేర‌కు ఇవాళ జాబితాను విడుద‌ల చేసింది.
డేటా విశ్లేషణ, పనితీరు పరిశీలన, ప్రజల నుంచి వచ్చిన సమాచారం ఆధారంగా ఆయా పోలీస్‌స్టేషన్లకు హోంశాఖ ర్యాంకులు ప్రకటిస్తోంది. ఆస్తులకు సంబంధించిన నేరాలు, మహిళలపై దాడులు, బలహీన వర్గాలపై దాడులు, తప్పిపోయిన వ్యక్తులు, గుర్తు తెలియని వ్యక్తులు, గుర్తు తెలియని వ్యక్తుల ఆచూకీ గుర్తింపు తదితర అంశాలను పరిగణలోకి తీసుకొని ర్యాంకులు కేటాయిస్తోంది. దేశవ్యాప్తంగా ప్రకటించిన ర్యాంకుల్లో టాప్‌10లో జమ్మికుంట పోలీస్‌స్టేషన్‌ నిలువడంపై రాష్ట్ర డీజీపీ మహేందర్‌రెడ్డి సిబ్బందిని అభినందించారు.