హైదరాబాద్: ఆస్ట్రేలియా గడ్డపై అడిలైడ్ వేదికగా జరిగిన తొలి టెస్టులో టీమిండియా 36 పరుగులకి ఆలౌటైన తర్వాత.. భారత్ జట్టు సిరీస్ గెలుస్తుందని ఎవరూ ఊహించలేదు. కానీ.. మెల్‌బోర్న్ వేదికగా జరిగిన రెండో టెస్టులోనే తాము అద్భుతం చేయబోతున్నట్లు హింట్ ఇచ్చిన టీమిండియా చివరిగా కంగారూల గబ్బా కోటని బద్దలుకొట్టి చారిత్రక విజయాన్ని సొంతం చేసుకుంది. అడిలైడ్ టెస్టు ముగిసిన రోజు అర్ధరాత్రి.. టూర్‌లో టీమిండియా తర్వాత వ్యూహాలపై చాలా సేపు చర్చ జరిగినట్లు ఫీల్డింగ్ కోచ్ ఆర్. శ్రీధర్ తాజాగా వెల్లడించాడు. ‘‘అడిలైడ్ టెస్టులో ఓడిపోయిన రోజు.. అర్ధరాత్రి 12.30 గంటలకి నాకు కెప్టెన్ విరాట్ కోహ్లీ నుంచి ఒక మెసేజ్ వచ్చింది. ఏం చేస్తున్నారు..? అని ఆ మెసేజ్ సారాంశం. ఆ టైమ్‌లో కోహ్లీ నుంచి అలా మెసేజ్ రావడంతో నేను తొలుత షాక్‌కి గురయ్యా. వెంటనే తేరుకుని నేను, చీఫ్ కోచ్ రవిశాస్త్రి, బౌలింగ్ కోచ్ భరత్ అరుణ్, బ్యాటింగ్ కోచ్ విక్రమ్ రాథోడ్ అందరం కూర్చుని ఉన్నాం అని రిప్లై ఇచ్చా. నేను కూడా మీతో జాయిన్ అవుతున్నా.. అని మళ్లీ కోహ్లీ మెసేజ్. ఫర్వాలేదు.. వచ్చేయ్ అని రిప్లై ఇచ్చా. అక్కడే మిషెన్ మెల్‌బోర్న్ స్టార్టయ్యింది. 36ని బ్యాడ్జ్‌గా తీసుకుని.. గర్వించేలా టీమ్ ప్రదర్శన టూర్‌లో ఉండాలని నిశ్చయించుకున్నాం. ఆ తర్వాత రోజు రహానెతో కోహ్లీ స్వయంగా మాట్లాడి.. వ్యూహాలని వివరించాడు’’ అని శ్రీధర్ వెల్లడించాడు.
అడిలైడ్ టెస్టు తర్వాత పెటర్నటీ లీవ్‌పై భారత్‌కి విరాట్ కోహ్లీ వచ్చేయగా.. మిగిలిన మూడు టెస్టులకీ అజింక్య రహానె కెప్టెన్‌గా టీమ్‌ని నడిపించాడు. మెల్‌బోర్న్ టెస్టులో 8 వికెట్ల తేడాతో విజయం సాధించిన భారత్.. ఆ తర్వాత సిడ్నీ టెస్టుని డ్రాగా ముగించుకుని.. చివరిగా గబ్బా టెస్టులోనూ 3 వికెట్ల తేడాతో విజయాన్ని అందుకుంది. 1988 నుంచి గబ్బాలో ఒక్క టెస్టు కూడా ఓడని ఆస్ట్రేలియాకి భారత్ జట్టు ఊహించని రీతిలో ఓటమి రుచి చూపింది.
