హైదరాబాద్ : విహార‌యాత్ర విషాద యాత్ర‌గా మారింది. ప్ర‌మాద వ‌శాత్తు బోటు నీట మున‌గ‌డంతో న‌లుగురు మ‌ర‌ణించారు. ఈ సంఘ‌ట‌న అసోం రాష్ట్రం జోర్హాట్ జిల్లాలో జ‌రిగింది. విహార‌యాత్ర‌కు వెళ్లిన కొంద‌రు ప‌ర్యాట‌కులు నాటు ప‌డ‌వ‌లో బ్ర‌హ్మ‌పుత్ర న‌దిలో విహ‌రిస్తుండ‌గా ఆ ప‌డ‌వ ఒక్క‌సారిగా మునిగిపోయింది. ప్ర‌మాదం జ‌రిగిన స‌మ‌యంలో ప‌డ‌వ‌లో మొత్తం 12 మంది ఉండ‌గా ఇద్ద‌రు మైన‌ర్‌లు స‌హా న‌లుగురు న‌దిలో మునిగిపోయారు. మిగితా 8 మందిని స్థానికులు ర‌క్షించి మ‌రో నాటు ప‌డ‌వ‌లో ఒడ్డుకు తీసుకొచ్చారు. ఒడ్డుకు చేరిన వారిలో ఇద్ద‌రి ప‌రిస్థితి విష‌మంగా ఉండ‌టంతో వారిని జోర్హాట్ మెడిక‌ల్ కాలేజీ ఆస్ప‌త్రికి త‌ర‌లించారు. ఈ ఘ‌ట‌న‌పై స‌మాచారం అందుకున్న స్టేట్ డిజాస్ట‌ర్ రెస్సాన్స్ ఫోర్స్ (ఎస్‌డీఆర్ఎఫ్‌) సిబ్బంది రంగంలోకి దిగి మృత‌దేహాల‌ను వెలికితీశారు. మృతులు ప‌బ‌న్ రాజ్ (30), ర‌జియా తిగుల (24), సాహిల్ చౌహాన్ (15), సుఫియాన్ చౌహాన్ (9)గా గుర్తించారు.