మోహాలీ: పంజాబ్‌లో గురువారం దారుణం జరిగింది. సరబ్‌జీత్ కౌర్ అనే టీచర్‌పై ఓ వ్యక్తి ఆకస్మాత్తుగా కాల్పులు జరపడంతో ఆమె మృతి చెందింది. మోహాలీ జిల్లా ఖరార్‌లోగల నాలెడ్జి బస్ గ్లోబల్ స్కూల్ గేటు వద్ద ఉదయం ఈ ఘోరం జరిగింది. అదే స్కూల్‌ల్లో ఫ్రెంచ్ టీచర్‌గా పనిచేస్తున్న ఆమె.. విద్యార్థులకు ఫ్రెంచ్, పంజాబీ నేర్పిస్తుంది. శుక్రవారం ఉదయం 7.45 గంటలకు స్కూల్ ముందు సరబ్‌జీత్ తన స్కూటీని పార్క్ చేస్తుండగా దుండగుడు ఈ ఘాతుకానికి ఒడిగట్టాడు. కళ్లముందే తన తల్లి కుప్పకూలిపోవడంతో భయపడిపోయిన చిన్నారి..అక్కడినుంచి పరుగుతీసింది. షాల్ ధరించిన వ్యక్తి ఉదయం నుంచీ స్కూల్ పరిసరాల్లో తిరగడం చూశామని ప్రత్యక్ష సాక్షులు తెలిపారు. ఈ హత్యకు గల కారణాలను తెలుసుకునేందుకు స్థానిక పోలీసులు ప్రయత్నిస్తున్నారు. కాగా..సరబ్‌జీత్‌కు 2012లో హర్వీందర్ అనే వ్యక్తితో వివాహం అయింది. పెళ్లి తరువాత దంపతులిద్దరూ ఫ్రాన్స్‌కు వెళ్లారు. అయితే.. హర్వీందర్‌కు అంతకుమునుపే వివాహమైనట్టు తెలుసుకున్న సరబ్‌జీత్..2013 అతడి నుండి విడాకులు తీసుకుంది. అప్పటి నుంచీ తన కూతురితో ఖరార్ ప్రాంతంలో నివసిస్తోంది. మరోవైపు.. నిందితులను పట్టుకునేందుకు పోలీసులు ముమ్మర ప్రయత్నాలు చేస్తున్నారు.
