బహుమతి
అనంత్‌ : పెళ్ళికొడుకు, పెళ్ళికూతురు ఇద్దరూ నీకు కావలసిన వాళ్లే కదా. మరి వాళ్ళకి ఏం కానుక ఇచ్చావు?
వెంకట్‌ : పెళ్ళికొడుక్కి కలర్‌ టీవీ, పెళ్ళికూతురికి రిమోట్‌ కంట్రోల్‌.
రహస్యం
సుబ్బారావు : 70 ఏళ్ళొచ్చినా మీ భార్యని డార్లింగ్‌, హనీ అని ఎంతో ప్రేమగా పిలుస్తున్నారంటే మీకు ఆమె మీద చాలా ప్రేమ ఉంది కదా సర్‌.
వెంకట్రావు : ప్రేమా, ఇంకేమన్నానా... నా భార్య పేరు మచ్చిపోయానయ్యా, ఆ విషయం తెలిస్తే ఏమంటుందోనని అలా పిలుస్తానంతే.
'మొర'గే కుక్క
పక్కింటి పుల్లారావుతో అన్నాడు సింగర్‌ సుబ్బారావు.
'నేను పాట పాడినప్పుడల్లా మీ కుక్క అరుస్తోంది. కాస్త వారించండి'
'మీరు పొరబడుతున్నారు. వాస్తవానికి మీరు పాట అందుకున్నప్పుడు మా కుక్క అరవడం లేదు' అన్నాడు పుల్లారావు.
'మరేం చేస్తోంది?' అడిగాడు సుబ్బారావు.
'పాటను ఆపండి మహాప్రభో.. అంటూ మొరపెట్టుకుంటోంది'
మరో జన్మ
బాస్‌ : మరో జన్మ ఉంటుందనేది నువ్వు నమ్ముతావా?
ఉద్యోగి : నమ్మను... అయినా ఇప్పుడా విషయం ఎందుకు అడుగుతున్నారు?
బాస్‌ : నిన్న మీ తాతయ్య చనిపోయాడంటూ నువ్వు సెలవు పెట్టావ్‌ కదా!. నువ్వు వెళ్లిన కొద్ది సేపటికే మీ తాతయ్య నీ కోసం మన ఆఫీసుకు వచ్చి వెళ్లాడు.
దొంగతనం
రాజు : మా ఇంట్లో గొలుసు పోయింది సార్‌.
పోలీసు : బంగారు గొలుసా? వెండి గొలుసా?
రాజు : కుక్క గొలుసు సార్‌.
ధ్వని కాలుష్యం
ప్రభుత్వ డాక్టరు : (ఆకస్మిక తనిఖీ చేస్తున్న మంత్రితో) మంత్రిగారూ! పక్కనున్న ఫ్యాక్టరీ నుంచి వచ్చే ధ్వని కాలుష్యం వల్ల ఈ ఆసుపత్రి రోగులకు చాలా ఇబ్బందిగా ఉందండీ.
మంత్రి : అయ్యో అలాగా! పోనీ ఇక్కడ చెవిటి రోగులనే చేర్చుకోండి.
కోర్టు వదిలేస్తుంది కానీ...
లాయర్‌ : చూడు అప్పారావు! మొన్న ఆదివారం హత్య జరిగిన చోట నువ్వు లేవని నిరూపిస్తే నీకు శిక్ష తప్పుతుంది.
అప్పారావు : ఆ సంగతి నాకూ తెలుసు సార్‌. ఆ రోజు విశాఖ బీచ్‌లో నా గాళ్‌ఫ్రెండుతో ఉన్నాను. ఈ మాట చెబితే కోర్టు వదిలేస్తుంది కానీ నా భార్య పట్టుకుంటుందే!
ఎస్మెమ్మెస్‌
జడ్జి : నువ్వు దొంగతనం చేసినప్పుడు సిసి కెమెరాలో రికార్డయింది తెలుసా?
దొంగ : ఏదీ చూపించండి.
జడ్జి : (వీడియో చూపించిన తర్వాత) చూశావుగా. మరి నీవేమైనా చెప్పాలనుకుంటున్నావా?
దొంగ : చూశారుగా. నా పర్ఫామెన్స్‌ నచ్చినట్లయితే డి.టి.ఎ దొంగ అని టైప్‌ చేసి 12121212కి ఎస్మెమ్మెస్‌ చేయండి. ప్లీజ్‌ ఓట్‌ ఫర్‌ మి.
దాని గురించే..
టీచర్‌ : క్లాసులో ఎప్పుడూ చూసినా మాట్లాడతారేంట్రా? నిశ్శబ్దంగా ఉండాలని చెప్పినా అర్ధంకాదా?
విద్యార్థులు : నిశ్శబ్దంగా ఎలా ఉండాలి అనేదాని గురించే మాట్లాడుకుంటున్నాం టీచర్‌.
సూపర్‌మ్యాన్‌
అమ్మాయి తండ్రి : అబ్బాయి సూపర్‌ మ్యాన్‌లా ఉన్నాడు కదమ్మా. నీకు నచ్చాడా?
అమ్మాయి : పర్వాలేదు నాన్నా. పెళ్లయ్యాక నాకు అనుకూలంగా వాచ్‌మెన్‌లా మార్చుకుంటాలే.
