మానవజాతి చరిత్రలో యావత్‌ ప్రపంచం స్తంభించిపోవడం ఇదే మొదటిసారి. ఒక మహమ్మారికి గజగజ వణికిపోవడం కూడా ఇదే తొలిసారి. అయిదు వందల ఏళ్ళ కిందటివరకు మొత్తం భూఖండంలోని మనుషులకు సంబంధం లేదు. అసలు అవతల మనుషులున్నారనే సంగతి తెలియకుండానే లక్షలాది సంవత్సరాలు గడిపేశారు. ఇవాళ మానవులంతా అనుసంధానమై ఉన్నారు. సకల ప్రాంతాల మధ్య సంబంధాలున్నాయి. ఇప్పటికీ అడవుల్లో ఆదిమానవుల మాదిరిగా జీవించే మనుషులున్నారు. వారి గురించి మిగతా ప్రపంచానికి తెలుసు. అందుకని ఎవరికి ఎవరు అస్పృశ్యులు కాదు. మొత్తం లోకమంతా అనుసంధానమై పురోగమించే వేళ మానవజాతి ప్రయాణానికి సడన్‌బ్రేక్‌ పడినట్టయింది 'కరోనా' వ్యాప్తితో.
ఆకాశంలో విమానాలు కనిపించడం లేదు. రహదారులపై వాహనాల రొద లేదు. రోడ్లు నిర్మానుష్యమై ఒంటరయ్యాయి. అడవులు, పర్వతాలు మానవ కదలికలతో సంబంధం లేక సేదతీరుతున్నాయి. మానవుడే మహనీయుడు, సృష్టికి ప్రతిసృష్టి చేయగల ధీమంతుడు అని వేనోళ్ళ కీర్తించబడిన మనిషి నిశ్చేష్టుడయ్యాడు. దాదాపు నాలుగు వందల సంవత్సరాలుగా శరవేగంగా విస్తరిస్తున్న శాస్త్ర, సాంకేతిక పరిజ్ఞానం కూడా ఈ విపత్తు ఎదుట విస్తుపోయి మౌనం దాల్చింది. దీన్ని అధిగమించే ప్రయత్నం మొదలయిందన్నది వేరే సంగతి. కానీ పునరావలోకనం తప్పనిసరయిన స్థితి మానవ పరిణామ చరిత్రలో కీలకఘట్టం.
పెట్టుబడిదారీ ఉత్పత్తి విధానం విస్తరించాక నిలకడ అన్నది లేనే లేదు. ఒక దశ నుంచి మరో దశకు వెళ్ళడమే తప్ప క్షణమాత్రమైనా ఆగింది లేదు, మన పయనమెటు అని యోచించిందీ లేదు. ఇపుడయినా యోచిస్తారన్న నమ్మకం లేదు. కానీ మానవ మేధకు ఇది పరీక్షా సమయం. ఒక ప్రాంతానికో, కొన్ని సమూహాలకో, ఇంకొన్ని వర్గాలకో పరిమితమైన సమస్యకాదు 'కరోనా'. అయిన ప్పటికీ మార్కెట్‌ ఎకానమీ ధోరణి మారలేదు. అందరికీ వైద్యపరీక్షలు నిర్వహిం చేందుకు ప్రభుత్వాలు, ఆసుపత్రులు సిద్ధంగా లేవు. లాభాపేక్ష మొదటి ప్రాధాన్యం అనే దుర్గుణం పోలేదు. పూట గడవటమే కష్టమైనవారు కనీసం పరీక్ష కూడా చేయించుకోలేరు. ఇక చికిత్స చేయించుకోడం ఎలా సాధ్యం?
మానవుల శ్రమశక్తితో నిర్మించిన బహుళ అంతస్థుల ఆసుపత్రులు డబ్బున్న మారాజులకే తప్ప పేదలకు చికిత్స చేసేందుకు సిద్ధంగా లేవు. వాటిని అదుపు చేయాల్సిన ప్రభుత్వాలు ప్రేక్షకపాత్ర వహించాయి. అంతమాత్రాన కరోనా వ్యాప్తి ఆగిపోతుందా? పేదలకు మాత్రమే వచ్చి, వారు మాత్రమే బలయి మిగతావారు బతికిపోతారా? అసలు ఇంత సంపద ఉండగా కొద్ది మంది ధనికులుగా, కోట్లమంది పేదలుగా ఉండిపోవడం ఎంత సిగ్గుమాలిన తనం. మనం సాధించిన ప్రగతికి ఎంత అవమానం! పెట్టుబడిదారీ విధానం సంపదల్ని పెంచిందే తప్ప వాటి సమ పంపిణీకి బాధ్యత తీసుకోలేదు. అందుకే కరోనా వ్యాప్తి నేపథ్యంలో పేదలు, మధ్యతరగతిలోనే బాధితులు ఎక్కువ. కానీ కరోనాకు వర్గబేధం లేదు. కొన్నాళ్ళు తమ గూట్లో తాము తల దాల్చుకోవచ్చు. కానీ బయటికి రావడం అనివార్యమైనప్పుడు ఎవరినీ వదలిపెట్టదు. అందుకే వైరస్‌కు వ్యాక్సిన్‌ కనిపెట్టడం, వైరస్‌ బాధితులందరికీ తగిన చికిత్స అందేలా వ్యవహరించడం పాలకుల బాధ్యత. ఈ బాధ్యతని గుర్తు చేయడం జనపక్షం వహించే వారి కర్తవ్యం. దీన్ని విస్మరిస్తే ఇవాళ్టి తరం చరిత్ర ముందు దోషిగా నిలబడుతుందన్నది నిస్సందేహం.
