అమ్మకు కవుల నీరాజనం
మే10వ తేదీ ఆదివారం సోపతి సంచిక చదివాను. 'మాత దినోత్సవం' సందర్భంగా సిహెచ్‌. ఉషారాణి రాసిన 'అమ్మ' ప్రధాన వ్యాసం బాగుంది. కవులెందరో తమ కవితల్లో అమ్మ లోని కమ్మదనాన్ని అద్భుతంగా వర్ణించారు. 'వికాసం' శీర్షికలో గంగాధర్‌ గారి 'మార్పు ను ఆహ్వానిద్దాం' ఆలోచింపజేసే విధంగా ఉంది. గల్ఫ్‌ దేశాల్లో లాక్డౌన్‌ లైఫ్‌ ను మనము కూడా ఆచరణలో పెడితే బాగుంటుంది.
- వేణు మారోజు, చౌటుప్పల్‌

అమ్మని సత్కరించిన కవితలు
'సోపతి'లో ప్రచురితమైన' అనురాగం పేరు అమ్మ' కవర్‌ పేజీ వ్యాసం మాతదినోత్సవాన్ని అద్భుతంగా ప్రెజెంట్‌ చేసింది. 'అంతరంగం' లో 'మరపురాని కావ్యం' శీర్షిక తో 'అమ్మ' విశిష్టతను వివరించిన తీరు బాగుంది. 'అమ్మ-నేను-తెలుగు సినిమా' వ్యాసంలో సినిమా రంగాన 'అమ్మ' ప్రాధాన్యతను ఏవిధంగా చూపించాలో వంశీకృష్ణ సచిత్రంగా తెలిపారు. భానుశ్రీ, దేవనపల్లి వీణావాణి కవితలు అమ్మని సత్కరించాయి.
- ముక్కెర రమేశ్‌ చంద్ర, గుర్రం పేట, జయశంకర్‌ జిల్లా

చక్కటి మేల్కొల్పు వీణారెడ్డి కథ
భర్తని ప్రేమించగలరు కానీ, అతని తల్లిని పక్కన పెట్టే ఆడవాళ్ళని చాలామందిని చూస్తున్నాం. వీణారెడ్డి కథలోని నాయిక కూడా ఆ కోవకు చెందిన మహిళ. అయితే భర్త డైరీ చదివి, తల్లి పట్ల అతనికి ఉన్న మమకారాన్ని అర్థం చేసుకొని ఆమెని ఇంటికి తీసుకురావాలని కోరుతుంది. ఈ మేల్కొల్పు బాగుంది. కానీ ఎంతమంది భార్యలు తమ అత్తల్ని ప్రేమించగలరన్నదే ప్రశ్న. నిజజీవితంలోనూ ఇలా జరిగితే ఎంత బాగుండు ననిపించిది కథ చదివితే.
- సైదారెడ్డి, సూర్యాపేట

ఆకట్టుకున్న అమ్మశిల్పం
అమ్మశిల్పం చూడముచ్చటగా వుంది. ఇక ఆ శిల్పం గురించి రాసిన తీరు మరింతగా ఆకట్టుకుంది. అమ్మల పట్ల ప్రేమని ఈవిధంగా వ్యక్తం చేయాలన్న కోరిక, దానికి ఆకృతి నిచ్చిన శిల్పకారుల ప్రతిభ మెచ్చుకోదగింది. నిజంగా ఈ శిల్పం దగ్గరకెళ్ళి చూడగలిగితేనా అనిపించింది ఈ ఫొటో చూడగానే.
- సంగీత, హైదరాబాద్‌

అమ్మకు అంకితం
మే 10వ తేదీ సంచిక అమ్మలకు అంకితమిచ్చినట్టుగా తీర్చిదిద్దారు. పదకేళిలోనూ, చౌరస్తాలోనూ, సినిమా శీర్షికలోనూ, కథ, కవిత్వంలోనూ అమ్మ గురించే చెప్పారు. అలాగే తమ అమ్మలతో గల అనుబంధాన్ని ఐనంపూడి శ్రీలక్ష్మి, వాసరచెట్ల జయంతి, ఝాన్సీ కొప్పిశెట్టి, అరుణ నారదభట్ల చెప్పిన తీరు నచ్చింది. మొత్తంగా ఈ సంచికని తల్లులకు అంకితం చేయడం ఆనందదాయకం.
- ఎం. పార్వతి, విజయవాడ