- నిర్మల్‌ జిల్లా కలెక్టర్‌ ముషారఫ్‌ అలీ ఫారూఖీ
నవతెలంగాణ-నిర్మల్‌టౌన్‌
నియంత్రిత వ్యవసాయ విధానంలో భాగంగా రాష్ట్ర ప్రభుత్వం ఆదేశాలు వచ్చేంత వరకు వరి విత్తనాలను అమ్మకూడదని జిల్లా కలెక్టర్‌ ముషారఫ్‌ అలీ ఫారూఖీ విత్తన డీలర్లను ఆదేశించారు. మంగళవారం కలెక్టరేట్‌ సమావేశ మందిరంలో అధికారులు, విత్తన డీలర్లతో సమావేశం నిర్వహించారు. ఈ సందర్భంగా కలెక్టర్‌ మాట్లాడుతూ రాష్ట్రంలో పంటల ఉత్పాదకత పెరగడం వల్ల ప్రభుత్వం నియంత్రిత పంటల విధానం అమలు చేయనుందన్నారు. ప్రభుత్వ సూచనల మేరకు వరి సన్న, సాధారణ రకం పండించే భూములను, రైతులను గుర్తించి విత్తనాలను పంపిణీ చేయాల్సి ఉంటుందని తెలిపారు. ప్రభుత్వ ఆదేశాలు రెండు మూడు రోజుల్లో వస్తాయని, అప్పటివరకు వరి విత్తనాలను డీలర్లు పంపిణీ చేయవద్దని అన్నారు. మొక్కజొన్న పంట సాగు చేసిన వారికి రైతుబంధు వర్తించదని, కనీస మద్దతు ధర ప్రభుత్వం చెల్లించదని తెలిపారు. ప్రభుత్వ మార్గదర్శకాలకు అనుగుణంగా రైతులు పత్తి పంట, రెడ్‌గ్రామ్‌ సాగు చేసుకోవాలన్నారు. మొక్కజొన్న విత్తనాలు అమ్మకూడదని డీలర్లకు సర్కులర్‌ జారీ చేయాలని జిల్లా వ్యవసాయ అధికారిని ఆదేశించారు. అనంతరం ఆయన వ్యవసాయాధికారులతో సాగుకు వినియోగించే యంత్ర పరికరాల స్టాక్‌ వివరాలను తెలుసుకున్నారు. జిల్లా వ్యవసాయాధికారి అంజిప్రసాద్‌ మాట్లాడుతూ ప్రభుత్వ ఆదేశాలు వచ్చేవరకు వారి విత్తనాలను అమ్మకూడదని డీలర్లకు సూచించారు. మండలం, క్లస్టర్‌, గ్రామాల వారీగా టార్గెట్‌ పంటల వారీగా కార్డు ఇవ్వనున్నట్టు తెలిపారు. చెప్పిన పంట వేసిన వారికి రైతుబంధు ఇవ్వనున్నట్టు తెలిపారు. సమావేశంలో సహాయ సంచాలకులు కోటేశ్వరరావు, మహమ్మద్‌ ఇబ్రహీంహనీఫ్‌, వినరుబాబు, వ్యవసాయాధికారులు, విత్తనాల డీలర్లు పాల్గొన్నారు.
