ఆకుల కళ్లతో చూస్తూ
మా ఆనందంలో చిగురిస్తూ
మా బాధలో రాలిపోతూ
మాతోబాటు పెరిగింది,
అందనంత ఎత్తుకు ఎదిగి
జ్ఞాపకాల కొమ్మలను పెంచుతూ
ఇంటికే విశాలమైన నీడయ్యింది!

పసిచేతులను
కొమ్మకొంగున ముడేసి
తనచుట్టూ తిప్పుకునేది,
ఒంటరిగా ఉన్నప్పుడు
ఆటబొమ్మై ఆడించేది,
బాధలో ఉన్నప్పుడు
ఉయ్యాలై ఒడిలోకి తీసుకునేది!

ఇంట్లో కంటే
చెట్టింటి కిందే మా లోకం,
చెట్టు పాదాల దగ్గరే మా పాదాలు
రెక్కలై ఎగరటం నేర్చుకున్నాయి!

రహదారి పామొచ్చి
ఒక్కగానొక్క చెట్టునూ
ఆనాటి బాల్యాన్ని మింగేసింది,
పచ్చని నెత్తురు వాసన గుండెకు తగిలి
ఊపిరికి అడ్డుపడింది,
పుట్టినచోటే కూలిపోయి
జీవితచక్రాన్ని ఎదుట నిలిపింది!

తన శవంపై తానే కట్టెలు పేర్చుకుని
మాకు ఎడారి సమాధిని మిగిల్చింది,
నిప్పు పెట్టకపోయినా సెగ తగిలించి
మరోజన్మకు సిద్ధమయ్యింది,
మౌనఘోషను మోసే మా మనసు
మళ్ళీ మొక్కయ్యాకే తేలికయ్యేది!

సాయంత్రం ఎప్పటిలా
గూటికోసం వచ్చే పక్షులకు శూన్యం కనిపిస్తే,
వాటి దిక్కుతోచని స్థితికి
కారణం చెప్పడానికి
మా దగ్గర సమాధానం లేదు!

- పుట్టి గిరిధర్‌
9491493170