మానవ జాతి మూలం ఒకటే అయినా కాల క్రమంలో రకరకాల జాతులుగా అది అభివృద్ధి చెందింది. దానికి అనేక కారణాలు ఉన్నాయి. ఈ కారణాల వల్లనే ప్రపంచంలో కొత్త జాతులు అవతరించడం, ఉన్న జాతులు నశించి పోవడం జరుగుతున్నది. ఆ విశేషాలను తెలిపే వ్యాసమే ఇది.
సమాజంలో పాక్షిక దృక్పథం ఉన్న వ్యక్తుల లేదా వర్గాల మధ్య కృత్రిమమైన కట్టుబాట్ల ద్వారా జాతి అభివృద్ధిని అదుపులో ఉంచడాన్ని సాంఘిక వరణం అంటారు. అటువంటి సాంఘిక ప్రమాణాలకు చెందిన వ్యక్తుల మధ్యనే ఈ పద్ధతిలో సంపర్కం ఏర్పడుతుంది. దాదాపు అన్ని రకాల సమాజాల లోను వ్యక్తుల లేదా వర్గాల మధ్య సాంఘిక వ్యత్యాసాలు ఉంటాయి.
చాలా సమాజాల్లో వివాహమనేది ఇష్టం వచ్చినట్లు జరగదు. సాధారణంగా చాలా కట్టుబాట్లతో ముడివడి ఉంటుంది. అయితే ఈ కట్టుబాట్లు ఆ సమాజాలలోని వివిధ వర్గ వ్యత్యాసాలకు అనుకూలంగా ఉంటాయనేది సహజం. ఉదాహరణకు అమెరికా లోని నలుపు, గోధుమ వర్ణం, పసుపు వంటి ఎన్నో రకాల రంగు జాతులవారున్నారు. సమాజపరయైన కట్టుబాట్లు ఈ వివిధ వర్గాల వాళ్లను ఒకరికొకరు దూరంగా ఉండేటట్లు చూస్తాయి. ఈవిధంగా కట్టుబాట్లనేవి వేర్పాటు శక్తులుగా పనిచేసి, జనాభా లోని ఆయా వర్గాల మధ్య పుట్టుకతో వచ్చిన వ్యత్యాసాలు బాగా నాటుకొనిపోయేటట్లు చేస్తాయి.
ఆకస్మిక మార్పు
వివిధ రకాలైన లక్షణాలు అకస్మాత్తుగా ఉద్భవించే పద్ధతిని 'ఆకస్మిక మార్పు' అంటారు. ఈ పద్ధతిలో ఒక ప్రత్యేకమైన జన్యువు ఒకరకమైన శాశ్వతమైన మార్పుని పొందుతుంది. ఇది ఒక పాత లక్షణానికి చెందిన కొత్తరూపం ఉనికికి దారితీ స్తుంది. ఈ 'మార్పు' అనేది పరిణామదశకు కావలసిన సామగ్రినంతా సిద్ధం చేస్తుంది. ఈ మార్పనేది లేకపోతే పరిణామ దశలో చెప్పుకోదగిన తేడా కనిపించదు. జనాభాలో ఈ మార్పులను ప్రవేశపెట్టడానికి ఏదో ఒక ప్రతినిధి అంటూ ఉండాలి.ఈ ప్రతినిధినే ఒకవిధమైన వరణం (సెలెక్షన్‌)గా చెప్పుకోవచు.
ఆకస్మిక మార్పులలో రెండు రకాలున్నాయి. ఒకటి జీనిక్‌ మ్యుటేషన్‌, 2 క్రోమోజోమల్‌ మ్యుటేషన్‌. ఒకజన్యువులో వచ్చే రసాయనిక మార్పు జీనిక్‌ మ్యుటేషన్‌ అవుతుంది. క్రోమోజోమ్‌ నిర్మాణంలోగాని లేదా క్రోమోజోమ్‌ సంఖ్యలో గాని వచ్చే మార్పు క్రోమోజోమ్‌ మ్యుటేషన్‌ అవుతుంది. ఒక కొత్త జన్యువు తయారయితేనే దానిని స్థూలంగా జీనిక్‌ మ్యుటేషన్‌ అని చెప్పవచ్చు. ఈ కొత్త జన్యువు తన తల్లి జన్యువు కంటె భిన్నమైన లక్షణాలను చూపిస్తుంది.
ఇప్పుడు నీగ్రోలకున్న చిక్కుల జుట్టు అనుకూలన విలువ ఉన్న ఒక మార్పు ఫలితమే. అంటే ఈ నీగ్రోల పూర్వులైన ఆదివాసు లకు నున్నని వెంట్రుకలు ఉండి ఉంటాయి. కాలక్రమంలో జన్యువుల్లో వచ్చిన మార్పు వల్ల నీగ్రోయిడ్‌ జాతిలో ఈ కొత్తరకం జుట్టు వచ్చింది.
ఆదిమానవులు చాలా చిన్న చిన్న గుంపులుగా జీవనం సాగించి నారు. అటువంటి చిన్న చిన్న గుంపులలో ఈ మార్పు (దానికి వరణాత్మక శక్తి ఉన్నట్లయితే) చాలా త్వరగా పాతుకొని పోయి, మొత్తం జనాభాలో అంతా అల్లుకొని పోతుంది. అటువంటప్పుడు ఆ లక్షణం ఆ జాతికంతటికీ ప్రత్యేక లక్షణం అవుతుంది.
జన్యు సంచలనం (జెనిటిక్‌ డ్రిఫ్ట్‌)
ఈ సిద్ధాంతాన్ని మొదటగా చికాగో విశ్వవిద్యాలయానికి చెందిన సీవాల్‌ రైట్‌ ప్రతిపాదించాడు. దీనిని సీవాల్‌ రైట్‌ ఫలితం అనికూడా అంటారు. సాధారణంగా ఈ పరిణామం అనేది జనాభాలోని జన్యువుల గతిలో మార్పు వల్ల వస్తుంది. ఈ జన్యువులలోనే జాతి నిర్మాణం మొదలవుతుంది. జన్యువుల సంచలనం అనేది కూడా మానవ జాతిలో అటువంటిదే. ఒక అనూహ్యమైన మార్పు (రాండం వారియేషన్‌) జనాభా తగ్గిపోయేకొద్దీ మూల లక్షణం నశించే అవకాశం ఎక్కువగా ఉంటుంది. ఉదాహరణకు ఒక దంపతుల సంతానం నలుగురూ ఒకే తెగకు చెందినవారనుకుందాం. అంటే నలుగురూ మగపిల్లలు లేదా నలుగురూ ఆడపిల్లలు కావచ్చు. 'ఎక్స్‌' లేక 'వై' కణాలున్న శుక్రకణంతో కలవడానికి దాదాపు ప్రతి అండానికి సమానావకాశాలు ఉన్నప్పటికీ, ఈ విధంగా ఒకే తెగ సంతానం కలగడమనేది చాలా తరచుగా జరుగుతూ ఉంటుంది. ఒక కుటుంబంలో నలుగురు పిల్లలూ ఒకే తెగకు చెందిఉండే అవకాశం 16లో 1 ఉంటుంది. ఈ పద్ధతిలో ఒక కుటుంబం లేదా అనేక కుటుంబాలు ఉంటే ఆ పిల్లలలో లైంగిక నిష్పత్తిని కలిపి చూసినప్పుడు ఏకత్వం కనిపిస్తుంది. అంటే ఆడపిల్లలు ఉన్నంతమంది మగపిల్లలు కూడా ఉంటారు. నలుగురు మగపిల్లలు గల కుటుంబాలకు సమానంగా నలుగురు ఆడపిల్లలు గల కుటుంబాలు ఉంటాయి. అయితే మానవ జాతి మొత్తంలో ఆవిధంగా భార్యా భర్తలు, వాళ్ల నలుగురు ఆడపిల్లలు మాత్రమే ఉన్నప్పుడు 'వై' క్రోమోజోములు నశించిపోయి 'ఎక్స్‌' క్రోమోజోములు మాత్రం నిలబడతాయి. దీని ఫలితం మానవ జాతి నాశనం అని వేరే చెప్పనవసరం లేదు. కొన్ని రకాల చెట్లు, జంతువులు నామరూపాలు లేకుండా నశించిపోవడానికి ఈ పరిణామమే కారణం కావచ్చు.
సంఖ్యాబలం బాగా తక్కువ అయ్యేటప్పటికి సహజంగా ఉపయోగపడే లక్షణాలు నశించిపోతాయి. అందువల్ల జనాభా తగ్గిపోతున్నప్పుడు జన్యువుల గతి ఒక తరం నుంచి మారే లేదా సంక్రమించే అవకాశం ఉంది. ఇటువంటి చలనం వల్ల ఒక లక్షణానికి చెందిన జన్యువు బాగా పాతుకుపోవచ్చు; లేదా పూర్తిగా నాశనం కావచ్చు. ఇది జనాభా తక్కువైనప్పుడు లేదా మిగిలిన ఎవరితోనూ సంబంధాలు లేకుండా ఉన్నప్పుడు బాగా పనిచేస్తుంది. ఆ జన్యువులో శాశ్వతమైన మార్పు వస్తుంది. ఆ జన్యువులో వచ్చిన మార్పు అందరిలోనూ కనిపిస్తుంది. ఆ జనాభాలో అంతకు ముందుండే లక్షణం పూర్తిగా కనిపించకుండా పోవచ్చు కూడా. అంతేకాక ఒక్కొక్కసారి ఈ అకస్మిక మార్పు చెందిన జన్యువు పూర్తిగా అంతరించిపోవచ్చు. మ్యుటెంట్‌ జన్యువులు ఇట్లా ఎక్కువ కావడం లేదా తగ్గిపోవడం జన్యు పౌన:పుణ్యం (జీన్‌ ఫ్రీక్వెన్సీస్‌)లో ఎన్నో అకస్మికమైన తేడాలకు దారితీస్తుంది. ఈ పరిణామాన్నే 'జన్యు సంచలనం' అంటారు.
ఈ జన్యు సంచలనం ఫలితంగా ఒకే జన్యు లక్షణాలలో ఏర్పడే జనాభాలు ఒకదానికొకటి దూరమైనప్పుడు క్రమంగా కొన్ని వ్యత్యాసాలకు లోనవుతాయి. ఉదాహరణకు పూర్వులు ఒకరే (ఏ, ఎ) అయినప్పటికీ రెండు జాతుల వాళ్లు జన్యు పౌన:పున్యం రీత్యా 'ఏ', 'ఎ' లక్షణాల ద్వారా చాలా దూరంగా విడిపోగలరు. కొంతకాలానికి ఒకరు 'ఏ' వర్గానికి చెందితే, మరొకరు 'ఎ' వర్గానికి చెందుతారు. వివిధ జనాభాలలో పి.టి.సి అనే ఫినైల్‌ థియోకార్బొమైడ్‌ లవణాన్ని రుచిచూడగలగటం లేదా రుచి చూడలేకపోవడం ఆయా జన్యువుల పైన ఆధారపడి ఉంటుంది. దీనిని బట్టి జన్యువులలో వచ్చే అకస్మిక మార్పులను గుర్తించవచ్చు.
- మౌక్తిక్‌
