టీనేజ్‌ అనగానే కుర్రాలకు అదో ఫీలింగ్‌. ప్రపంచాన్నే గెలిచినంతా అనుభూతి. ఎవరేం చేయలేరనే కాన్ఫిడెన్సు. సరదాలు, షికార్లు, సాహసాలు, సిల్లీ ముచ్చట్లు అన్నిటికీ కేరాఫ్‌ అడ్రస్‌ టీనేజ్‌ కానీ కాస్త వయసు దాటితే ఇవి కావాలన్నా దొరకవు. వయసైపోయాక ఇతరులతో గర్వంగా చెప్పుకోవడానికి ఎన్నో అందమైన అనుభూతులను ఈ వయసులోనే మూటగట్టుకుంటారు. అందుకే ఏ వయస్సులో చేయాల్సిన పనులు ఆ వయసులో చేసుకోవాలం టారు. కానీ టీనేజ్‌లో మాత్రం జాగ్రత్తగా అడుగులేయాలి. ఈ ఏజ్‌లో వేసే అడుగులే ఫ్యూచర్‌ను, వ్యక్తిత్వాన్ని, గుణాన్ని నిర్ణయిస్తాయి. టీనేజ్‌లో అడుగుపెట్టిన అమ్మాయిలు, అబ్బాయిలు చాలా ఉత్సాహంగా, ఉల్లాసంగా ఉంటారు. అన్ని విషయాల్లోనూ ముందుండటానికి ఉబలాటపడుతుంటారు. అది ప్రేమైనా, పోటీలైనా, ఆటలైనా, అల్లరి అయినా, ఫ్యాషన్‌లైనా, ఫైట్లయినా దేనికైనా సిద్ధంగా ఉంటారు. ఈ వయసులో శరీరం, బుద్ధి, మనసు అన్నీ చురుగ్గా ఉండటమే దీని కారణం. అంతర్గతంగా విడుదలయ్యే రసాయనాలు పోటెత్తుతుంటాయి. నవ్వుతూ, తుళ్లుతూ ప్రపంచమంతా తదేనన్నంత దీమాతో ఉంటారు. అయితే.. ఈ వయసులో గుర్తుంచుకోవాల్సిన విషయం ఒకటుంది. తమకిష్టమైన వాటినే కాకుండా పెద్దలు చెప్పినది, లెక్చరర్లు తెలిపినది మంచి అంశాలను బ్యాలెన్స్‌గా ఉండేటట్టు చూసుకోవాలి. అప్పుడే టీనేజ్‌లో ఉన్న హాయి, ఆనందం జీవితాంతం గుర్తుంటుంది.
కొంతమంది యువతీ, యువకులు ఎవరేం చెప్పినా వినరు. తాము అనుకున్నవి, స్నేహితులు చెప్పినవి మాత్రమే తలకెక్కుతాయి. మంచో, చెడో దేన్ని ఎంచుకోవాలో అర్థంకాని పరిస్థితుల్లో ఉంటుంది వీరి మనసు. కొత్తకొత్త వాటిపై బుద్ధి మరలుతుంటుంది. అన్ని తెలుసుకోవాలనే ఉబలాటం ఎక్కువగా ఉంటుంది. శరీరం, మనసు ప్రశాంతంగా ఒకచోట నిలబడవు. ఈ వయసు వారికి ఒకచోట కుదురుగా ఉండనివ్వదు. ఒక పనీ శ్రద్ధగా చేయాలనిపించదు. బాధ్యతలు, విలువలు తెలిశాక, లైఫ్‌లో సెట్‌ అవ్వాలనే ఆలోచనల్లో పడ్డాకా దేన్ని పాటించాలో, ఏ మార్గాన్ని ఎంచుకోవాలో ఆయోమయానికి గుర్వయ్యే ప్రమాదం ఉంది. వీటన్నింటి ఫలితంగా విపరీత మానసిక ఒత్తిడికి లోనవుతారు. అప్పుడు చాలా సంయమనం పాటించాలి. తమని తాము ఉన్నతంగా తీర్చిదిద్దుకోవాలి. సరైన స్థాయిలో దిశానిర్దేశం చేసుకోవాలి. అప్పుడే టీనేజ్‌ మధురంగా ఉంటుంది. టీనేజ్‌ దాటిన తర్వాత సమాజంలో ఒక బాధ్యత కలిగిన వ్యక్తులుగా ఎదుగుతారు. ఉన్నత స్థానాలను అధిరోహిస్తారు. ఉన్నత స్థాయికి చేరుకున్నాక టీనేజ్‌లో చేసిన మీ చేష్టలు జ్ఞాపకాలుగా మీకు ఆనందాన్ని ఇచ్చే విధంగా ఉండాలే కానీ గిల్టీగా ఉండేలా చూసుకోవొద్దు.
