కూతురి నవ్వు చూస్తుంటే కడుపు నిండిపోయింది వీరస్వామికి..
''వర్షీ ఇలా రా..'' నాన్న పిలుపుతో వర్షిత నాన్న దగ్గరికి వెళ్ళింది..
''ఏం ఆలోచిస్తున్నావ్‌ రా..? నాకు తెలుసులే నీ రాజ కుమారుడి గురించే కదా...''
''నాన్న ముందు నా చదువు తర్వాతే పెళ్లి..''అంటూ నాన్నతో చెప్పింది వర్షిత.
''సర్లే రా నీ ఇష్టాన్ని ఎప్పుడు కాదన్నాం.. నా బంగారానికి ఇష్టం ఉంటేనే.. ఇప్పటి నుండి చూస్తేనే కదరా..మంచి సంబంధం కుదిరేది.''
''మీ ఇష్టం నాన్న'' అని వర్షి అన్న ఒక్క మాటతో.. సంతోషంతో బిడ్డను ప్రేమగా తలనిమిరాడు వీరస్వామి..

భార్య ఝాన్సీ ''ఏవండోరు.. మీ తండ్రీ, కూతుర్ల ప్రేమ బాగుంది.. ముందు ఈ టీ తెచ్చా తీసుకోండి'' అంటూ టీ అందజేసింది ఝాన్సీ.
భార్య అందించిన టీని ఆస్వాదిస్తూ వీరస్వామి తన గతంలోకి జారుకున్నాడు.
వీరస్వామి, ఝాన్సీల వివాహం అయిన ఐదు సంవత్సరాల తర్వాత మొదటి కాన్పు అందింది..
మొదటి, రెండు కాన్పుల్లో పురిట్లోనే బిడ్డలను కోల్పోయింది..
ఈ సమాజంలో శుభకార్యాలకు వెళ్లిన ఒక స్త్రీని పిల్లలు లేకపోతే ఆమెని సూటిపోటి మాటలతో సూదుల్లాంటి చూపులతో గుచ్చడం.. ఇలా.. వారనే మాటలకు ఝాన్సీకి చాలా బాధగా ఉండేది..
ఎంత బాధపడే మాటలు ఎదుటివారు అన్నా.. ఒక్క తన భర్త అండగా, తనతో ధైర్యంగా ఉంటే చాలు.. అన్నీ మర్చిపోవడానికి.. ఝాన్సీకి భర్త ప్రేమ మెండుగా దొరకడం ఆమె సంతోషానికి కారణం.. మూడవ ప్రసవం..
హాస్పిటల్‌కి బయలుదేరే సమయంలో ఝాన్సీ అత్తగారి మాటలు.. ''ఈ సారైనా సక్కగా జరిగేనా ప్రసవం.''
ఈ మాటతో వీరస్వామి కోపంతో.. ''నువ్‌ నోరు మూయవే.. సాటి స్త్రీగా కోడలికి ధైర్యం చెప్పేదిబోయి అపశకున పక్షిలా.. నువ్వూ. నీ ఆలోచనా విధానం..
పరమేశ్వరా.. ఈ సారైనా.. నా భార్యకు క్షేమంగా ప్రసవం జరిగేలా చూడు స్వామీ..''
హాస్పిటల్‌ లోపలికి తీసుకెళ్లారు..
నర్సు బయటికి వొచ్చింది.. ఏం వార్త చెప్తుందో ఏమోనని వీరస్వామి చేతులు వణుకుతున్నాయి.. ఈ సారి నా భార్య క్షేమంగా ప్రసవం కాకపోతే.. ఆ మాట విని నిబ్బరంగా ఉండగలిగే ధైర్యం నా భార్యకు లేకపోతే.. చూసి తట్టుకునే ధైర్యం నాకు లేదయ్యా.. నువ్వే కాపాడు..
నర్సు క్లాప్స్‌ కొట్టి..
''మీ భార్య పండంటి బిడ్డకి జన్మనిచ్చింది'' అంటూ.. కంగ్రాట్స్‌ చెప్పింది..
ఆ మాటతో వీరస్వామి సంతోషంతో ఉక్కిరిబిక్కిరి అయ్యాడు..
టీ తాగాక పేపర్‌ చదవడం మొదలు పెట్టాడు..
ఒక్కసారిగా షాక్‌ అయ్యాడు.. ''వామ్మో.. వాయ్యో.. ఈ కరోనా మహమ్మారి ఇండియాకి కూడా వొచ్చిందోరు.. మొన్నటి వరకు చైనాకు పరిమితం అయింది.. ఇప్పుడు దేశ దేశాలకు అంటుకుంటుంది..''
లాక్‌ డౌన్‌ నెల రోజులు ఉంటుందట.
రేపటి నుండే ప్రారంభం...
సరుకులు తేవాలి అన్నావ్‌ కదా.. ముందే చెప్పు వెళ్లి తీసుకొని వొస్తా..''
వర్షిత ''నాన్నా..రేపు హైద్రాబాద్‌ వెళ్ళాలి పుస్తకాలకు...'' అనగానే..
వీరస్వామి..''అమ్మా కరోనా కేస్‌ పాసిటివ్‌ వొచ్చింది ఎక్కడ అనుకుంటున్నావ్‌..? హైదరాబాద్‌లోనే పాజిటివ్‌ నమోదు అయింది.. నీ పీజీ ఎంట్రన్స్‌ పుస్తకాలు తర్వాత అయినా తీసుకోవొచ్చు..
వామ్మో నువ్వు ముందే మన ఊరుకు రావడం మంచిది అయింది. అక్కడ ఉంటే ఎంత ఇబ్బంది అయ్యేది. పక్కింటి ప్రభాకర్‌ చెప్పాడు. వాళ్ళ కూతురుని ఇంటికి పంపించడానికి కూడా అనుమతి లేదంటా.. చాలా బాధపడ్డాడు. ఈ పరిస్థితుల్లో అక్కడికి వెళ్లడం మంచిది కాదు. ఆ మహమ్మారి మన దగ్గరికి చేరకుండా ఉంటే చాలు. ఇప్పుడు ఉన్న పుస్తకాలు చదువు'' అనగానే..
అమాయకమైన మొహంతో లోపలికి వెళ్ళింది వర్షిత.
''అవునే ఈ వారం అమ్మాయిని పెళ్లి చూపులు చూడటానికి వొస్తున్నారు.. గుర్తుందా..''అంటూ భార్య వైపు చూసాడు వీరస్వామి..
ఝాన్సీ ఒక్క చూపు చూసి ..
''ఏవండీ ఈ కరోనా సమయంలో.. ఎలా రమ్మంటారండీ'' అనడంతో..
ఏముందే కాల్‌ చేసి నోటితో రమ్మని చెప్పడమే అన్నాడు భర్త
ఝాన్సీ ''ఈ వెటకారంకి తక్కువేం లేదు. అయినా ఒక్కగానొక్క కూతురు. అంబరాన్నంటేలా వివాహం చేయాలి. ఈ సమయంలో పెళ్లి చూపులేంటండీ. కుదిరినా.. బంధువులు ఎవరూ లేకుండా... అయినా ఇప్పుడు పెళ్ళికొచ్చిన ఆరాటం ఏమి లేదు. దాని పీజీ కానివ్వండి. వాళ్ళకి కాల్‌ చేసి రావొద్దు చెప్తాను'' అనడంతో ఆమె మాటకి ఏకీభవించాడు వీరస్వామి..
క్లర్కుగా ఉద్యోగం చేస్తున్న వీరస్వామికి వార్తలు చూడటం, పేపర్‌ చదవడం వల్ల ఆరోగ్య సూచనల పట్ల అవగాహన ఉంది..
సరుకులు కొనడానికి చేతులకు శానిటైజర్‌ చేతులకు రాసుకొని, మొఖానికి మాస్క్‌ కట్టుకొని బైక్‌ మీద బయలు దేరాడు..
క్యూ లైన్‌ లో సరుకులు తీసుకోవడానికి నిలబడ్డాడు..
''కరోనా పట్ల జాగ్రత్త పాటించండి.. దూరం పాటించక పోతే సరుకులు ఇవ్వమని చెప్తున్నాడు షాపు యజమాని..
ఈ లోగా వీరస్వామి పక్కన ఉన్న ఒక వ్యక్తి మాస్క్‌తోనే తుమ్మాడు..
జాగ్రత్త వహించిన వీరస్వామి జేబులో ఉన్న శానిటైజర్‌ తీసుకొని చేతులకు రాసుకొని హమ్మయ్య.. ఈ కరోనా నా దగ్గరికి రాదని ధైర్యంగా ఉన్నాడు..
సరుకులు తీసుకొని ఇంటికి బయలుదేరుతున్న సమయంలో.. వొచ్చే దారిలో లాక్డౌన్‌ వల్ల ముందు రోజుల్లో పేద ప్రజలు ఇబ్బంది పడుతున్నారని గ్రహించిన కొందరు రాజకీయ పార్టీ వారు సరుకులను అందజేస్తున్నారు...
వీరస్వామి వెంటనే.. అయ్యో అనవసరంగా సరుకులు తీసుకున్నాను.. ముందు తెలిసినా.. డబ్బులు మిగిలేవి కదా..
అయినా ఏముంది లైన్‌లో నిలబడి సరుకులు తీసుకుంటా.. బండి కనిపించకుండా దూరం పెడితే పేదవాడు అనుకొని సరుకులు ఇస్తారు.. నా భార్య మరో నెల రోజులకు సరిపడే సరుకులు తెచ్చాడు అంటూ సంతోషిస్తుంది అనుకుంటూ.. లైన్‌లో నిలబడి వారు అందజేసిన నెలకి సరిపడా సరుకులు తీసుకున్నాడు.
ఇలా బయటికి వొస్తుంటే.. మాసిన దుస్తులతో ఒక స్త్రీ తన చంటి బిడ్డని తీసుకొని లైన్‌లో నిలబడినా.. అప్పటికే ఆమెకు సరుకులు అందకపోవడం గమనించాడు.
ఒక్క క్షణం ఆలోచించాడు.. ''నేను ఒక ఉద్యోగస్తుడిని. సరుకులు కొనుక్కునే స్థోమత ఉన్నవాడినై ఉండి ఈ సామాగ్రిని తీసుకోవడం తప్పు .. ఆమె చంకలోని బిడ్డని, ఆమెను చూస్తుంటే బాధగా అనిపించిన వీరస్వామి అతను తీసుకున్న సరుకులను, తన దగ్గర ఉన్న ఐదు వందల రూపాయలను చంటిబిడ్డ తల్లికి ఇచ్చాడు.
ఆమె ''దండాలయ్యా అంటూ''.. రెండు చేతులను జోడించి నమస్కరించింది...
ఇంటికి వెళ్లిన తర్వాత జరిగిన విషయం కుటుంబ సభ్యులతో పంచుకున్నాడు వీరస్వామి..
భార్య నా భర్త మనసు బంగారం అంటూ.. భర్త పాదాలకు నమస్కరించింది..
కూతురు నాన్న నుదురుపై ముద్దుపెట్టింది..
ఆ పార్టీ వారు ఇచ్చిన సరుకులు ఇంటికి తెస్తే..వీరి కళ్ళలో మానవత్వపు పరిమళం వికశించే ఆనందం చూసేవాడిని కాదంటూ.. వీరస్వామి కళ్ళలో నీళ్ళు తిరిగాయి...

- పెద్దపల్లి తేజస్వి,
9603329474