మెడపైన ఉన్న చర్మంను చూసి కొందరు ఇట్టే వయసును పట్టేస్తారు. చలికాలం మాయి శ్చురైజర్లు, ఎండకాలంలో సన్‌ స్క్రీన్లు.. ఇవన్నీ మనం రాసేది ముఖానికి, చేతులకు, కాళ్లకు. కానీ మనలో చాలామంది మెడ భాగాన్ని పట్టించుకోరు. దీంతో మెడ భాగంలో ఉన్న చర్మం త్వరగా ముదిరిపోయినట్టు కనిపించటం, సాగటం, ముడతలు పడటం వంటివాటికి లోనవుతుంది. దీంతో మన అందం కూడా తగ్గుతుంది. మెడపై ఉన్న చర్మం అత్యంత సున్నితంగా ఉంటుంది. చాలామంది మెడపైన ఉన్న చర్మాన్ని అస్సలు పట్టించుకోరు. ముఖ్యంగా మెడపైన ఉన్న చర్మం చాలా సున్నితంగా ఉంటుందనే విషయాన్ని కూడా మనలో చాలామంది గుర్తించరు. మనకు వయసు మీదపడుతున్న విషయాన్ని గుర్తు చేసేది, కొట్టొచ్చినట్టు చూపేది ఇక్కడ ఉన్న చర్మమే. మెడపైన చర్మం ఆరోగ్యాన్ని కాపాడేందుకు చక్కని వ్యాయామాలు ఉన్నాయి. లాక్‌ డౌన్‌ టైంలో చాలామంది తమ చర్మాన్ని సంరక్షించుకునేందుకు ప్రత్యేక శ్రద్ధ చూపారు.
ఫోన్‌ తగ్గించండి: మీ స్క్రీన్‌ టైం బాగా పెరిగేకొద్దీ తల వంచి పదేపదే గంటల తరబడి చూస్తుంటారు. దీంతో మెడకింద భాగంపైన ఉన్న చర్మంపై ముడతలు ఎక్కువగా వస్తాయి. నెక్‌ టోనింగ్‌ కోసం ప్రత్యేకమైన వ్యాయామాలు చేయండి. ముఖ్యంగా ఫోన్‌ చూసేటప్పుడు తల వంచకుండా ఉండేందుకు ప్రయత్నించండి. ఫోన్‌ వాడకాన్ని బాగా తగ్గించటం మంచిది. ఫోన్‌ను చూసినప్పుడల్లా మీ ఐ లెవెల్‌కు తగ్గట్టుగా ఎత్తిపట్టుకుని చూడటం మంచిది. దీంతో మెడ సాగి, కొత్తగా ముడతలు పడకుండా ఉంటుంది.
మాయిశ్చురైజ్‌ చేయండి: ముఖానికి మాయిశ్చురైజర్‌ రాసినట్టు, చేతులకు బాడీ లోషన్‌ రాసినట్టు.. మీ మెడపై కూడా మాయిశ్చురైజర్లు రాయాల్సిందే. ఇలా చేస్తే మెడపై నెక్‌ లైన్స్‌ కనిపించవు. మెడపై రాసేందుకు ప్రత్యేక క్రీములు కూడా అందుబాటులోకి వచ్చాయి. దీంతో మరింత ఎక్కువ మార్పు మీ మెడపైన ఉన్న చర్మంపై కనిపిస్తుంది. మీ ముఖంలానే మెడపై చర్మం కూడా నిగారిస్తుంది.
మెడపై ఎండ పడకుండా: మెడభాగం ఎండలో ఎక్కువ ఎక్స్‌ పోజ్‌ కాకుండా ఉండేలా జాగ్రత్తలు తీసుకోవాలి. ఎండ ఎక్కువ లేకపోయినా ఈ జాగ్రత్త తీసుకోవటం తప్పనిసరి. సీజన్‌ ఏదైనా మీ మెడపై తీసుకోవాల్సిన శ్రద్ధను మరవద్దు. సూర్య కిరణాల్లోని అల్ట్రావైలట్‌ రేస్‌ మీ మెడపైన ఉన్న సున్నితమైన చర్మాన్ని బాగా డ్యామేజ్‌ చేసి, త్వరగా వద్ధాప్య జాడలు మీదపడేలా చేస్తుంది. కాబట్టి ఇలా జరక్కుండా ఉండేలా నిరంతరం కేర్‌ తీసుకోండి. ముడతలు త్వరగా రాకుండా ఉండేలా అల్ట్రా వైలెట్‌ రేస్‌ మీ మెడపై పడకుండా సన్‌ ప్రొటెక్షన్‌ ఫ్యాక్టర్లతో జాగ్రత్తపడండి.
పడుకునేముందు: పడుకునే ముందు మీరు కాళ్లు, చేతులు, ముఖం కడుక్కున్నట్టుగానే మీ మెడ భాగాన్ని శుభ్రం చేసుకోండి. రాత్రి పడుకోబోయే ముందు స్నానం చేయనివారు ఇలా మెడభాగాన్ని కూడా రోజూ క్లీన్‌ చేసుకోవటాన్ని రొటీన్‌గా పెట్టుకోండి. మెడపైన ఉన్న సూక్ష్మ క్రిములు, మురికి చర్మాన్ని మరింత డ్యామేజ్‌ చేసి, ముడతలు వచ్చేలా చేస్తుంది. కాబట్టి మెడభాగాన్ని శుభ్రంగా ఉంచుకోవాల్సిందే.
