మంచినీళ్ల తర్వాత ఎక్కువ మంది తాగేది టీనే. అందుకే ఈ టీలలో కొత్త కొత్త రకాలను తయారుచేస్తున్నారు. రుచితో పాటు సువాసన కూడా వేర్వేరుగా ఉండేలా చేస్తున్నారు. కొందరికి తియ్యటి పాలతో చేసిన టీ నచ్చితే, మరికొందరికి స్పైసీ టీలు, ఇంకొందరికి పుల్లటి టీలు టేస్టీగా ఉంటాయి. చిక్కగా, కమ్మగా, స్ట్రాంగ్‌గా ఎవరికి నచ్చినట్టు వారు టీ చేసుకోవచ్చు. కొంత మంది మేం టీ తాగం అంటారు. కానీ టీ తాగితే ఎంతో మేలు. ఎందుకంటే తేయాకులో యాంటీఆక్సిడెంట్స్‌ చాలా ఎక్కువగా ఉంటాయి. అవి మన శరీరంలో విష వ్యర్థాలను తరిమేస్తాయి. గ్రీన్‌ టీ లాంటివి అధిక బరువును తగ్గిస్తాయి. అల్లం టీ జబులు, గొంతులో గరగరను పోగోడుతుంది. ఇప్పుడు మనం చెప్పుకోబోయేది లెమన్‌ గ్రాస్‌ టీ గురించి. ఈ లెమన్‌ గ్రాస్‌ (గడ్డి మొక్క)ను ఇళ్లలో పెంచుకోవచ్చు. ఆహారంలో వేసుకోవచ్చు. టీలాగా తాగొచ్చు. మరి దీనితో ప్రయోజనాలేంటో తెలుసుకుందాం.
యాంటీ ఆక్సిడెంట్స్‌: మిగతా టీల్లాగే ఇందులోనూ శరీరంలోని విషవ్యర్థాల్ని తరిమేసే యాంటీ ఆక్సిడెంట్స్‌ ఉంటాయి. కణాలు పాడవకుండా కాపాడతాయి. అందువల్ల వ్యాధులు వచ్చే అవకాశాలు తగ్గుతాయి. గుండెకు ఈ టీ ఎంతో మేలు చేస్తుంది.
దంతాలకు మేలు: ఈ టీలో సూక్ష్మక్రిముల అంతు చూసే లక్షణం ఉంటుంది. అది మన నోటి దంతాలను కాపాడుతుంది. దుర్వాసన పోగొడుతుంది. చిగుళ్లు దెబ్బ తినకుండా కాపాడుతుంది.
కాన్సర్‌ రాకుండా: రకరకాల వ్యాధుల్లో ఒకటైన కాన్సర్‌ రాకుండా లెమన్‌ గ్రాస్‌ టీ కాపాడుతోందని పరిశోధనల్లో తేలింది. కీమోథెరపీ చేసే సమయంలో ఈ టీ ఇస్తున్నారు.
జీర్ణశక్తికి: కొంతమందికి ఏం తిన్నా సరిగా జీర్ణం కాదు. అలాంటి వారు తిన్న తర్వాత ఈ టీ తాగితే దెబ్బకు అరిగిపోతుంది. అధిక బరువు తగ్గుతారు కూడా.
చర్మానికి మేలు: చర్మంపై మొటిమలు, మచ్చలు, ఆనికాయలు, కురుపులు ఇలాంటివి ఏవి ఉన్నా ఈ టీ తాగుతూ ఉంటే క్రమంగా అవి తగ్గిపోతాయి. ఎందుకంటే ఈ టీలోని గుణాలు చెడు కణాల్ని తొలగించి మంచి కణాల్ని పెంచుతాయి.
