''ప్రేమ సంకెళ్లు'' తో తెలుగు చిత్ర పరిశ్రమలో హీరోగా ఎంటర్‌ అయి దాదాపు వందకు పైగా చిత్రాల్లో హీరోగా నటించి మంచి పేరు సంపాదించుకున్నారు వికే నరేష్‌ . ఆ తర్వాత సెకండ్‌ ఇన్నింగ్స్‌ ప్రారంభించి క్యారెక్టర్‌ ఆర్టిస్ట్‌గా 150 చిత్రాలకు పైగా నటించి సక్సెస్‌ఫుల్‌గా తన సినీ ప్రయాణాన్ని కొనసాగిస్తున్నారు. కళలపై ఉన్న ప్యాషన్‌తో ఎన్నో కార్యక్రమాలు చేస్తూ, మరో ప్రక్క మూవీ ఆర్టిస్ట్‌ అసోసియేషన్‌కు అధ్యక్షుడిగా తనవంతు బాధ్యతలను నిర్వహిస్తున్న డా. నరేష్‌ పుట్టినరోజు బుధవారం. ఈ సందర్బంగా ఆయన పుట్టినరోజు వేడుక తాజ్‌ డెక్కన్‌ హౌటల్‌లో అభిమానులు, శ్రేయోభిలాషుల మధ్య వైభవంగా జరిగింది. ఈ సందర్భంగా నరేష్‌ మాట్లాడుతూ,'మా అమ్మ విజయనిర్మల ఆశీర్వాదం.. మా గురువు జంధ్యాల, ఈవివి ప్రోత్సహంతో 'ప్రేమ సంకెళు', 'నాలుగు స్థంబాలాట' నుండి 100కి పైగా చిత్రాల్లో హీరోగా నటించాను. మధ్యలో కొంత బ్రేక్‌ తీసుకుని, సెకండ్‌ ఇన్నింగ్స్‌ స్టార్ట్‌ చేసినప్పుడు యస్వి రంగారావుగారిని స్ఫూర్తిగా తీసుకుని 150 చిత్రాల్లో క్యారెక్టర్‌ ఆర్టిస్ట్‌గా పలు వైవిధ్యమైన పాత్రలు పోషించాను. నేను ఊహించని వెరైటీ పాత్రలు చేస్తున్నాను. కరోన టైమ్‌లో అంగీకరించిన 11 చిత్రాలు పూర్తి చేశాను. ప్రస్తుతం ఓ పది చిత్రాల్లో డిఫరెంట్‌ వెరీయేషన్స్‌ ఉన్న క్యారెక్టర్స్‌ చేస్తున్నాను. ఇన్నేళ్ళ సినిమా జర్నీ మరువలేనిది. 49 సంవత్సరాల నా సినీ ప్రయాణంలో నాకు సహకరించిన తోటి నటీనటులకు, సాంకేతిక నిపుణులకు, దర్శక, నిర్మాతలకు కతజ్ఞతలు' అని తెలిపారు.