సందీప్‌ కిషన్‌, లావణ్య త్రిపాఠి జంటగా డెన్నీస్‌ జీవన్‌ కానుకొలను దర్శకత్వంలో తెరకెక్కిన చిత్రం 'ఎ1 ఎక్స్‌ప్రెస్‌'. ఈ నెల 5న గ్రాండ్‌గా ఈ సినిమా విడుదల కానుంది. ఈ సందర్భంగా చిత్ర నిర్మాతలు విశ్వ ప్రసాద్‌, అభిషేక్‌ అగర్వాల్‌, దయాపన్నెం సోమవారం మీడియాతో ముచ్చటించారు. ఆ విశేషాలు వాళ్ళ మాటల్లోనే.. 'ఈ సినిమా చేయటానికి సందీప్‌కి ఇది 25వ సినిమా కావడం ఓ కారణమైతే, తమిళంలో స్పోర్ట్స్‌ అండ్‌ మ్యూజికల్‌ సినిమాగా ఇది మంచి హిట్‌ కావడం మరో కారణం. హాకీ గేమ్‌ కావడంతో మేకింగ్‌ పరంగా రియల్‌ హాకీ స్టేడియాల్లోనే చిత్రీకరించాం. వీటిల్లో బాలీవుడ్‌ స్టార్‌ హీరో షారుఖ్‌ఖాన్‌ నటించిన బిగ్గెస్ట్‌ బ్లాక్‌ బస్టర్‌ 'ఛక్‌ దే'లో కనిపించిన స్టేడియంలో కూడా కొన్ని సన్నివేశాలను చిత్రీకరించాం. మన జాతీయ క్రీడ హాకీ అయినప్పటికీ ఇండియాలో ఎక్కువగా క్రికెట్‌ చూస్తారు. అయితే హాకీ బ్యాక్‌డ్రాప్‌లో వచ్చిన ఈ సినిమా తప్పకుండా ప్రేక్షకులను అలరిస్తుంది. ఈ చిత్రానికి కూడా ఓటిటి ఆఫర్స్‌ వచ్చాయి. కానీ మేం అంగీకరించలేదు. ఎందుకంటే ఈ సినిమాని తీసిన లొకేషన్స్‌, కథలోని ఎమోషన్స్‌, స్పోర్ట్స్‌లో ఉండే సోల్‌ని థియేటర్స్‌లోనే ఎక్స్‌ పీరియన్స్‌ చేస్తేనే చాలా బాగుంటుంది' అని తెలిపారు.
