డైరెక్టర్‌ అనిల్‌ రావిపూడి సమర్పణలో శ్రీ విష్ణు, లవ్‌లీ సింగ్‌ హీరో, హీరోయిన్లుగా రూపొందుతున్న చిత్రం 'గాలి సంపత్‌'. రాజేంద్రప్రసాద్‌ టైటిల్‌ రోల్‌ పోషిస్తున్నారు. అనిల్‌ ఈ చిత్రానికి సమర్పకుడిగా వ్యవహరించడంతో పాటు స్క్రీన్‌ప్లే, దర్శకత్వ పర్యవేక్షణ కూడా చేస్తున్నారు. అనిల్‌ కో-డైరెక్టర్‌, రైటర్‌, మిత్రుడు ఎస్‌.క్రిష్ణ నిర్మాతగా ఇమేజ్‌ స్పార్క్‌ ఎంటర్‌టైన్మెంట్‌ బ్యానర్‌ను స్థాపించి, షైన్‌ స్క్రీన్స్‌తో కలిసి అనీష్‌ దర్శకత్వంలో ఈ చిత్రాన్ని నిర్మిస్తున్నారు. తాజాగా ఈ చిత్రంలోని 'పాప ఓ పాప' అంటూ సాగే పాటని యువ కథానాయకుడు విజరు దేవరకొండ విడుదల చేసి, టీమ్‌కి ఆల్‌ ది బెస్ట్‌ తెలిపారు. 'పాప ఓ పాప నీ పేరు తలిచినే మజ్నునయ్యానే..పాప ఓ పాప నా పేరే మరిచినే పిచ్చోన్నయ్యానే..' అంటూ హుషారుగా సాగే ఈ పాటకి రామజోగయ్య శాస్త్రి సాహిత్యం అందించగా, బెన్ని దయాల్‌, బెన్‌ హ్యూమన్‌, అనుదీప్‌ దేవ్‌ ఫుల్‌ ఎనర్జీతో ఆలపించారు. అచ్చురాజమణి సమకూర్చిన బాణీలు సంగీత ప్రియుల్ని అలరిస్తున్నాయి. ఈ నెల 7న ఈ చిత్ర ప్రీ రిలీజ్‌ ఈవెంట్‌ని జరిపి, ఈనెల 11న ప్రపంచవ్యాప్తంగా ఈ సినిమాని విడుదల చేయనున్నారు.
