'మారుతున్న టెక్నాలజీకి అనుగుణంగా మనమూ మారదాం అని జీనియస్‌ రామ్‌ గోపాల్‌ వర్మ ఒక కొత్త మార్గాన్ని సినీ పరిశ్రమకు పరిచయం చేశారు. భవిష్యత్‌ అంతా చిన్న సినిమాలకి ఏటిటి (ఎనీ టైమ్‌ థియేటర్‌)యే కరెక్ట్‌ దారి. దీనివల్ల చిన్న సినిమా విడుదలలో ఎదుర్కొంటున్న అనేక సమస్యలకి పరిష్కారం దొరికింది. త్వరలోనే మా భీమవరం టాకీస్‌ బ్యానర్‌ నుంచి ఏటీటీ ఫ్లాట్‌ఫామ్‌ని అందుబాటులోకి తీసుకొస్తున్నాం' అని అంటున్నారు నిర్మాత టి.రామసత్యనారాయణ తెలిపారు.
ఈ సందర్భంగా ఆయన మాట్లాడుతూ, 'ఒక చిన్న బడ్జెట్‌ సినిమా విడుదలకు టీవీ, పేపర్, పోస్టర్స్‌, ఆడియో ఫంక్షన్స్‌, హోర్డింగ్స్‌ లాంటి పబ్లిసిటీ ప్రమోషన్‌లకు 25 నుండి 50 లక్షలు అవుతుంది.50 థియేటర్స్‌లో విడుదల చేస్తే 7.50 లక్షలు. డిజిటల్‌కి కట్టాలి. కొన్ని థియేటర్స్‌కి అద్దె కూడా చెల్లించాలి. ఇవన్ని దాటుకుని ఈ చిన్న సినిమాలను 100 లేదా 150 రూపాయల టికెట్‌ కొని ప్రేక్షకులు చూస్తారనే నమ్మకం లేదు. కలెక్షన్స్‌ లేకపోతే థియేటర్స్‌ ఇవ్వరు. ఇన్ని సమస్యల మధ్య చిన్న బడ్జెట్‌ సినిమాని విడుదల చేస్తే కలెక్షన్స్‌ లేక పోవటం వల్ల ఒక రోజులోనే సినిమా తీసివేసే అవకాశం ఉంది. అయితే ఇప్పుడీ సమస్యలకు శాశ్వతంగా పరిష్కారం దొరికింది. శ్రేయస్‌ ఈటీ వాళ్ళు పే పర్‌ వ్యూ పద్దతిలో 'క్లైమాక్స్‌', 'నగం' సినిమాలు విడుదల చేసి విజయం పొందారు. ఇదే బాటలో భీమవరం టాకీస్‌ పేరు మీద ఒక ఏటిటిని త్వరలో ప్రేక్షకుల ముందుకు తీసుకు వస్తున్నాం. ఇది ఒక మల్టీప్లెక్స్‌ థియేటర్‌ లాంటిది. ఇందులో మేం సినిమాల్ని కొనం, ఎవరైనా కొంటేె అమ్ముకునే హక్కులు/నిర్ణయం నిర్మాతదే. మా థియేటర్‌లో నిర్మాతలకు తమకి నచ్చిన సినిమాలను ప్రదర్శించుకోవచ్చు. అలాగే సదరు సినిమాలకు సంబంధించి ప్రమోషన్‌ని నిర్మాతలు మాతో కలిసి చేసుకోవచ్చు. లేకపోతే వారికి వారే సొంతంగా పబ్లిసిటీ కూడా చేసుకోవచ్చు. ఈ థియేటర్లలో టిక్కెట్‌ ధర 50 లేక 75 రూపాయలు ఉంటుంది. సినిమాని ఎన్ని రోజులు కావాలంటే అన్ని రోజులు ప్రదర్శించుకోవచ్చు. ఎవరైనా బయ్యర్‌ వస్తే నిర్మాత అమ్ముకోవచ్చు. పూర్తి హక్కులు నిర్మాతకే ఉంటాయి. ఎవరైనా ఒక టిక్కెట్‌ కొంటె ఎస్‌ఎమ్‌ఎస్‌ రూపంలో ఆ నిర్మాతకి వస్తుంది. ఆ డబ్బు నిర్మాత ఎకౌంట్‌లోకి 14 రోజుల్లో ట్రాన్స్‌ఫర్‌ అవుతుంది. ఇతర పబ్లిసిటీ ఖర్చులు నిర్మాతకు ఉండవు. నిర్మాత తీసిన సినిమా క్వాలిటీ, కంటెంట్‌ని బట్టి ప్రేక్షకుడు చూస్తాడు. సినిమాని చూడాలనుకున్న ప్రేక్షకులు 3 రోజుల్లో చూడొచ్చు. ఇది చాలా మంచి ప్రయత్నం. నిర్మాతల మండలి కూడా చిన్న బడ్జెట్‌ నిర్మాతల కోసం ఇలాంటి 'ఎటీటీ' యాప్‌ను త్వరలో స్టార్ట్‌ చేసేందుకు అన్ని రకాల ప్రయత్నాలు చేస్తోంది' అని తెలిపారు.
