దిశ కేసులోని నలుగురు నిందితుల్ని పోలీసులు ఎన్‌కౌంటర్‌ పేరుతో చంపేశారు. ఈ ఎన్‌కౌంటర్‌, ఎన్‌కౌంటర్‌ పేరుతో కస్టడీ హత్యకు ఉన్న అన్ని లక్షణాలను కలిగి ఉంది. ఆ రాత్రి లైంగికదాడి, హత్య జరిగిన స్థలానికి వారిని తీసుకొని వెళ్లినప్పుడు పోలీసుల మీద దాడి చేయటం వలన చనిపోయారని చెప్పారు. అనుమానితులు పోలీసు కస్టడీలో ఉండటం, ఆ కారణంగా వారి దగ్గర ఎలాంటి ఆయుధాలు ఉండకపోవటం, పోలీసులు అబద్ధాలు చెబుతున్నారని స్పష్టంగా తెలుస్తోంది.
ఇప్పుడు మనందరికీ న్యాయం జరిగిందని చెబుతున్నారు. బాధితురాలి హత్యకు ప్రతీకారం జరిగిందంటున్నారు. నిందితులు చనిపోయారు కాబట్టి పోలీసులు, ప్రభుత్వం, సమాజం సరిగ్గా ఉన్నాయని గట్టిగా నమ్ముతూ మనం అందరం మన మన పనుల్లోకి వెళ్లిపోవచ్చు. కానీ, ఈ న్యాయం నకిలీది. 'హత్యను' న్యాయంగా చూపించే వ్యవస్థ ఎలాంటిదంటే అది 'మహిళలకు వీధుల్లో భద్రత కల్పించలేం, మహిళలపై జరిగే నేరాలను విచారించి తప్పు రుజువు చేసేంత సాక్యాలను ప్రవేశపెట్టలేం, అత్యాచార బాధితులను రక్షించలేం (ఉత్తరప్రదేశ్‌లో ఒక లైంగికదాడి బాధితురాల్ని సజీవ దహనం చేశారు), అత్యాచార బాధితులకు కోర్టులో గౌరవం కల్పించలేమని' అని మహిళలకు చెబుతోంది.
వీళ్లు నలుగురు అనుమానితులే అనే విషయం మర్చిపోకూడదు. వీరు నిందితులని రుజువు చేసే సాక్ష్యం ఏమైనా ఉందో లేదో మనకు తెలియదు. ఈ ఒప్పుకోవడాలను భారతదేశంలో పోలీసులు అలవాటుగా హింస ద్వారా చేయిస్తారు. హింస ఎప్పుడు నిజాన్ని వెలికి తీయదు. కాబట్టి ఈ చనిపోయిన నలుగురు దిశను నిజంగా హత్య చేసి చంపిన వారు అవునో కాదో తెలియదు.
ఇదే హైదారాబాద్‌ పోలీసులు, తమ కూతురి సంగతి తెలుసుకొనే విఫల ప్రయత్నం చేస్తున్న బాధితురాలి తల్లిదండ్రులను ఎగతాళి చేశారు. మహిళలు ఏమి చేయాలో, ఏమి చేయకూడదో చెబుతూ ఈ పని చేశారు. అంటే మహిళలు రాత్రి 8 తరువాత బయట తిరిగితే, రహదార్లను భద్రంగా ఉంచి తాము వారిని రక్షించలేమని వారికి చెప్పారు. అదే పోలీసు ఇప్పుడు రేపిస్టులను పట్టుకొని శిక్షించామని మనల్ని నమ్మమంటున్నారు. వాళ్లే జడ్జిలుగా, న్యాయ సంఘంగా, తలారీలుగా వ్యవహరిస్తున్నారు. ఇది ఒక క్రూరమైన జోకు.
మహిళా ఉద్యమాలు ఇది న్యాయం కాదని మొదటిగా చెబుతాయి. పోలీసులు, న్యాయవ్యవస్థ, ప్రభుత్వాలు, తమ బాధ్యత దారిని మూసివేసే కుట్ర ఇది. బాధ్యత తీసుకొని మహిళల హక్కుల విషయంలో తన ప్రభుత్వ వైఫల్యానికి సంబంధించి మన ప్రశ్నలకు జవాబు ఇచ్చే బదులు - పోలీసులు మూకదాడి హత్యలకు నాయకులుగా వ్యవహరిస్తున్నారు.
ఇలాంటి కస్టడీ మరణాలు తప్పదు అని వాదించేవారు ఇంకోసారి ఆలోచించండి. హైదరబాద్‌, తెలంగాణ పోలీసులు ఇలాంటి హత్యలకు చెడుగా ముద్రవేయబడ్డారు. వరంగల్ వేదికగా 2008లో స్వప్నిక, ప్రణితలపై యాసిడ్‌ దాడి కేసులో ముగ్గురిని కస్టడి హత్యకు గురి చేశారు. ఆ హత్యలు హైదారా బాద్‌, తెలంగాణ లేక భారతదేశంలో మహిళల మీద నేరాలను తగ్గించలేదు. యాసిడ్‌ దాడులు, లైంగికదాడులు, మహిళా హత్యలు ఎలాంటి శిక్షలు లేకుండా జరుగుతూనే ఉన్నాయి.
ఈ ఎన్‌కౌంటర్‌ విషయంలో పూర్తి విచారణ జరపాలని డిమాండ్‌ చేస్తున్నాం. ఈ ఎన్‌కౌంటర్‌కు బాధ్యులైన పోలీసులను అరెస్టు చేసి, విచారణ చేసి, కోర్టులో హత్యకు గురి అయిన నలుగురిని ఆత్మ రక్షణార్థం మాత్రమే చంపామని రుజువు చేసుకోమనాలి. ఇది మానవ హక్కులకే కాదు, మహిళల హక్కులకు కూడా ముఖ్యమైన విషయం. ఎందుకంటే ఎలాంటి జవాబుదారీతనం లేకుండా, ఎలాంటి ప్రశ్నలను ఎదుర్కోకుండా చంపగలగటం అంటే- వాళ్లు మహిళలను కూడా అత్యాచారం చేసి, ఎలాంటి ప్రశ్నలు ఉండవనే ధీమాతో చంపగలరు.
ఛత్తీస్‌ఘడ్‌లో మీనా కేసులో సంగతి గుర్తుకు తెచ్చుకోండి. ఆమెను ఛత్తీస్‌ఘడ్‌ పోలీసులు సామూహిక లైంగికదాడి చేసి చంపేశారు. జుడీషియల్‌ విచారణ అది లైంగికదాడి, హత్యను కవర్ చేసే ఎన్‌కౌంటర్‌ అని తేల్చింది. ఆ రేపిస్టుల మూక న్యాయ విచారణ ఇంకా ఎదుర్కోవాల్సి ఉంది. మేము ఈ కష్టడీ హత్యలను, మూక హత్యలను న్యాయంగా అంగీకరించం కాబట్టి చాలా టీవీ చానళ్లు, హిందూత్వ సామాజిక మాధ్యమ సైన్యాలు, మహిళా ఉద్యమకారుల్ని శత్రువులుగా చెబుతాయి. ఈ చానళ్లు, ఈ సైన్యాలే గతంలో కతువా కేసులో నిందితులను సమర్ధిస్తూ చేసిన ర్యాలీలను సమర్థించాయి. ఆ రేపిస్టులకు కోర్టులో శిక్ష పడిన తరువాత కూడా సమర్థించాయి. వీళ్లే ప్రధాన న్యాయమూర్తి గొగోయి మీద లైంగిక వేధింపు ఫిర్యాదు చేసిన మహిళను అబద్ధాలకోరు అన్నారు. వీళ్లే లైంగిక వేధింపుల గురించి ఫిర్యాదు చేసిన జేఎన్‌యూ, జాదవ్‌ పూర్ విద్యార్థునులను అసభ్య భాషలో అవమానించారు. వీళ్లే గ్యాంగ్‌ రేప్‌ నిందితుడిగా ఉన్న కుల్దీప్‌ సెంగార్‌ను సమర్థించారు.
మేము, మహిళా ఉద్యమకారులం, మహిళలకు నిజమైన న్యాయం కోసం పోరాడుతూనే ఉంటాం. మేము పోలీసులు వారి విధులను నిర్వర్తించాలనీ, మహిళల హక్కులకు రక్షణ కల్పించాలని కోరుకొంటాం. వారిని జడ్జీలుగా, తలారీలుగా వ్యవహరించాలని కోరుకోము. పోలీసులు రేపిస్టులుగా ప్రకటిస్తూ హత్య చేసే పౌరాణిక 'సామూహిక చేతన'ను కోరుకోం. మేము మార్పు కోరుకొనే సమాజపు చేతనను ఆశిస్తాం. అత్యాచారం, లైంగిక వేధింపుల కేసుల్లో మహిళలకు అండగా ఉంటూ గౌరవంగా చూడటాన్ని కోరుకొంటాం.
- కవితా కృష్ణన్‌
