....15వ పేజీ తరువాయి
నున్నగా షేవ్‌ అయిన గడ్డాన్ని తడుముకుంటూ ''గుడ్‌. బాగా చేశావు'' అని పోలీస్‌ అధికారి మెచ్చుకుని తన రివాల్వర్‌ మీద చేయి వేసి ''నువ్వు ఆ రహస్య దళం సభ్యడవని నాకు తెలుసు. నేను ఇక్కడికి వస్తే నువ్వు చంపేస్తావని మా వాళ్ళు చేప్పారు. అయినా వచ్చాను. చంపడం అనుకున్నంత సులభం కాదు. నేను నా డ్యూటీ మాత్రమే చేస్తున్నాను'' అని చెప్పి షేవ్‌ చేయించుకున్నందుకు ఇవ్వవలసిన డబ్బు ఇచ్చి వెళతాడు.
కథ చిన్నదే. కానీ ఎన్ని ప్రశ్నలు రేకెత్తిస్తుంది. పోలీస్‌ అధికారి, బార్బర్‌ రెండే రెండు పాత్రలు. అయితేనేమి? ఒక జీవిత సత్యాన్ని అలవోకగా చెప్తాయి. ఎవరి డ్యూటీ వాళ్ళు చేయవలసిందే. బార్బర్‌గా తన దగ్గరకు వచ్చిన వాళ్లకు, వాళ్లకు నచ్చేలా పని చేసి పంపించడం అతడి విధి. ఆ విధిని స్వాతంత్య్ర సంగ్రామం లాంటి ఎంత పెద్ద విషయాలయినా అడ్డుకోలేవు. అడ్డుకోకూడదు. అది ధర్మం. అందుకే ఆ ధర్మాన్ని పాటించడానికి బార్బర్‌ గొంతు మీద పెట్టిన కత్తిని తీసేశాడు. బార్బర్‌ రహస్య దళ సభ్యుడే. కానీ అతడిని చంపమని ఆ అధికారికి ఏమీ ఆదేశాలు లేవు. చంపడం అధికారి డ్యూటీ కాదు. పైనుండి వచ్చిన ఆదేశాలను అమలు పరచడమే అతడి డ్యూటీ. అందుకే కదా ఇన్‌ఫార్మర్‌ని చంపకుండా వదిలి పెట్టింది? ఎవరి ధర్మం వాళ్ళు పాటించడమే వృత్తిని నిరపేక్షంగా చేయడమంటే.
అన్ని కథలూ ఇక్కడ నేను చెప్పలేను కానీ చివరి కథ లచ్చవ్వ గురించి చెప్పకుండా ఉండలేను. ఉన్న వూళ్ళో జీవితం గడవక, చేసిన అప్పులు తీర్చడం కోసం బెంగళూరులో ప్యాకర్స్‌ అండ్‌ మూవర్స్‌ సంస్థలో పనిచేసే కొడుకు దగ్గరకు బయలుదేరుతుంది లచ్చవ్వ. బెంగళూరులోని బాన్సవాడి ప్రాంతంలో కొడుకు మరొక స్నేహితుడు హరీష్‌తో కలిసి ఉంటున్నాడు. లచ్చవ్వ వచ్చిన తరువాత లచ్చవ్వ, లచ్చవ్వ కొడుకు బీరప్ప, కొడుకు స్నేహితుడు హరీష్‌ కలిసే ఒక గదిలో వుంటూ వుంటారు. ఆ రోజు హరీష్‌ పుట్టిన రోజని తెలుసుకున్న లచ్చవ్వ, కొడుకు, కొడుకు స్నేహితుడు హరీష్‌ డ్యూటీకి వెళ్ళగానే హరీష్‌కి ఇష్టమైన స్వీట్‌ తీసుకుని వద్దామని బయటకు వెళుతుంది. ఆ స్వీట్‌ కోసం తాము ఉంటున్న బాన్స్‌వాడి ప్రాంతం నుండి చాలాదూరం వచ్చేస్తుంది. నగరం మాయలోపడి బాన్స్‌వాడి పేరు మర్చిపోతుంది. అసలు కొడుకు ఎక్కడ పనిచేస్తున్నాడో, సంస్థ పేరేమిటో కూడా ఆమెకు తెలియదు. నగరంలో దారి తప్పుతుంది. బాన్స్‌వాడికి బసవన్నగుడికి తేడా తెలియక బసవన్నగుడిలో తేలుతుంది. అక్కడి నుండి ఆమె కొడుకును ఎలా చేరింది అన్నది మిగతా కథ. చివర్లో ప్రేక్షకుడిని కన్నీళ్లు పెట్టిస్తుంది లచ్చవ్వ. లచ్చవ్వ పాత్ర చేసినామెకు ఇంతకుముందు ఏ సినిమాలోనూ చేసిన అనుభవం లేదట. అందుకేనేమో ఆమె నటించలేదు. జస్ట్‌ బిహేవ్‌ చేసింది. ఆ స్క్రీన్‌ బిహేవియర్‌ మీకు నచ్చుతుంది.
తెలుగులో ఇలా కథల సమాహారంతో సినిమాలు వచ్చాయో లేదో నాకు తెలియదు. చందమామ కథల గురించి విన్నాను కానీ చూడలేదు. కనుక నాకు మాత్రం ఈ 'కథా సంగమం' చూడటం మంచి అనుభవం. రొటీన్‌ మాస్‌ మసాలా కమర్షియల్‌ సినిమాల ఉధృతి నుండి కొంచెం పక్కకు తొలగి జీవితాన్ని నింపాదిగా, అంచనా వేసుకోవాలంటే ఇలాంటి సినిమాలు అప్పుడప్పుడు చూడాలి. ఇందులో సాగర సంగమం అన్న కథ పైన చెప్పిన కథల కంటే ఇంకా బావుంటుంది. వీలుంటే ఈ ఆదివారం చూడండి. అమెజాన్‌ ప్రైమ్‌లో వుంది.
- వంశీకృష్ణ,
9573427422