- నిర్వహణకు టీ.సాట్‌ సన్నాహాలు
నవతెలంగాణ బ్యూరో-హైదరాబాద్
ఈ యేడాది ఏప్రిల్‌ నెలలో జరిగే స్టాఫ్‌ సెలెక్షన్‌ కమిషన్‌ ఉద్యోగ పోటీ పరీక్షల కోసం తెలుగు, ఇంగ్లీష్‌ భాషల్లో టి-సాట్‌ నెట్వర్క్‌ ఛానళ్లు పాఠ్యాంశాల ప్రసారాలు చేయనున్నట్లు సీఈవో ఆర్‌.శైలేష్‌రెడ్డి ప్రకటించారు. ఈ మేరకు ఆదివారం ఒక పత్రిక ప్రకటన విడుదల చేశారు. జనవరి 25న లైవ్‌ ప్రసారాలతో ప్రారంభమై 27వ తేదీ నుంచి ఏప్రిల్‌ 12వ తేదీ వరకు సాధారణ ప్రసారాలు కొనసాగించాలని నిర్ణయించామని తెలిపారు. స్టాఫ్‌ సెలక్షన్‌ కమిషన్‌ (ఎస్‌ఎస్‌స్సీ) ఆధ్వర్యంలో దేశ వ్యాప్తంగా వివిధ స్థాయిల్లో ఉద్యోగాల నియామకం కోసం సుమారు 12,328 నోటిఫికేషన్లు విడుదల చేసిందన్నారు. పరీక్షలు ఏప్రిల్‌ 12వ తేదీ నుంచి వారం రోజుల పాటు జరగనున్నట్టు బోర్డు ప్రకటించిందన్నారు. కంబైన్డ్‌ గ్రాడ్యుయేట్‌ లెవెల్‌ 6,506, హయ్యర్‌ సెంకడరీ లెవెల్‌ 5,522 ఉద్యోగాలకు సంబంధించి గెజిటెడ్‌, నాన్‌ గెజిటెడ్‌, జూనియర్‌, సీనియర్‌ అసిస్టెంట్‌, డాటా ఎంట్రీ ఆపరేటర్లు తదితర ఉద్యోగాల పోటీ పరీక్షలకు తాము అందించే పాఠ్యాంశాలు ఉపయోగపడతాయని వివరించారు.
25న ప్రత్యేక ప్రత్యక్ష్య ప్రసారాలు
పోటీ పరీక్షలపై అవగాహన కల్పించేందుకు అనుభవం కలిగిన సబ్జెక్టు నిపుణులచే ఈ నెల 25వ తేదీ సోమవారం రోజున ప్రత్యేక ప్రత్యక్ష్య ప్రసారాలు చేయనున్నట్టు సీఈవో తెలిపారు. ఉదయం 11 గంటల నుంచి మధ్యాహ్నాం ఒంటి గంట వరకు లైవ్‌ ఉంటుందన్నారు. సబ్జెక్టు నిపుణులతో పాటు సాంకేతిక నిపుణులు అందుబాటులో ఉంటారనీ, పరీక్షలు రాసేందుకు సిద్ధమయ్యే అభ్యర్థులు తమ సందేహాలను ఫోన్‌ ద్వారా 040-23540326, 23540726 టోల్‌ ఫ్రీ 1800 425 4039 నెంబర్లకు కాల్‌ చేయాలని సూచించారు.
