సుక్కపడ్తేగానీ కుదురుగా కూసునే రకం కాదు. ఒక్కపూట పుచ్చుకోకపోతే ఆసుబోసినట్టు ఆడ్కీడ్కి తిరిగే బాపతు. కరోనా దెబ్బకు ఇండ్లకే పరిమితం కావాలన్న నిబంధనతో మద్యం బాబుల వ్యథ అంతా ఇంతా కాదు. అలవాటైన పాణానికి మందు దొరక్క ఆగమాగం జేస్తున్నరు. చిందులేస్తున్నరు. రోడ్లపొంటపడి ఉరుకుతున్నరు. పొర్లాడుతున్నరు. తన్లాడుతున్నరు. వాళ్లనాపడం ఇంటోళ్ల తరం అస్సలైతలే. కంపౌండ్‌ కల్లుకు అలవాటుపడ్డోళ్లు పిచ్చిపిచ్చి చేయబట్టే. మొన్ననే పట్నంల షాపు ముందల కూసోని ఒకాయన మెడకాయ గోసుకున్నడు. తమిళనాటనైతే మత్తు కోసం థమ్సప్‌డబ్బల గడ్డం గీసుకునే ముందు రాసే క్రీమ్‌ను కల్పుకుని తాగి ఇద్దరు సచ్చిర్రు. గిట్టయితే రాష్ట్రంల కరోనాతోని ఏమోగానీ మందు దొరక్క సచ్చేటోళ్లు ఎక్కువైతరేమోనన్న ప్రచారం జరుగుతున్నది. మందుబాబులు ఆగలేక దుకాణాలను లూటీ జేసుడు మొదలుపెట్టిర్రు. ఇప్పటికే రెండుమూడు చోట్ల చేసిండ్రు. గివన్నీ బక్కచిక్కినోళ్లు ఉండే ఏరియాలల్లోనే జరుగుతున్నయి సుమా! మరే పబ్బులపొంటి తాగితందనాలు ఆడే పెద్దోళ్లు, వాళ్ల పిల్లలకు మందు యాడ్కెల్లి వస్తున్నది? దొర్కపోతే ఒక్కరు కూడా మందు మనాది పెట్టుకుని దవఖానాల పొంటి ఎందుకొస్తలేరు? డౌటానుమానం. చివరి ముచ్చటేటంటే 400 రూపాల బాటిల్‌ 1500లకు...1000 రూపాల బాటిల్‌ మూడు వేలకు గుట్టుచప్పుడు కాకుండా అమ్ముతున్నట్టు గుసగుసలు వినిపిస్తున్నయి. కొన్నిచోట్ల పట్టుబడ్డరు కూడా!
- అచ్చిన ప్రశాంత్‌
