- అర్జెంటీనాలో భారీ ప్రదర్శనలు
బ్యూనస్‌ఎయిర్స్‌: అంతర్జాతీయ ద్రవ్యనిధి (ఐఎంఎఫ్‌) విధానాలను వ్యతిరేకిస్తూ సామాజికోద్యమ సంస్థలు, రాజకీయ పార్టీలు, కార్మిక సంఘాలు బ్యూనస్‌ ఎయిర్స్‌లో భారీ నిరసన ప్రదర్శన నిర్వహించాయి. 'రుణ బకాయిల చెల్లింపు' ఒప్పందాన్ని రద్దుచేయాలన్న నినాదంతో ఈ ప్రదర్శన జరిగింది. గత మార్షియో మాక్రీ సర్కారు ఐఎంఎఫ్‌ నుంచి తీసుకున్న రుణాన్ని రద్దు చేయాలని, లాటిన్‌ అమెరికా దేశాలను ఐఎంఎఫ్‌ వదిలి వెళ్లాలని డిమాండ్‌ చేస్తూ వారు ఈ ప్రదర్శన నిర్వహించారు. గత ప్రభుత్వం ఐఎంఎఫ్‌ నుంచి తీసుకున్న రుణం పూర్తిగా చట్ట విరుద్ధమైనదనీ, ప్రజల జీవన ప్రమాణాలను పణంగా పెట్టి ఈ రుణాన్ని చెల్లించేందుకు తాము అంగీకరించబోమని ఈ సంస్థలు స్పష్టం చేశాయి. నగరంలోని డౌన్‌టౌన్‌ కార్యాలయానికి చేరుకున్న ఐఎంఎఫ్‌ ప్రతినిధి వర్గానికి వారు తమ నిరసనను తెలియచేస్తూ వినతిపత్రాన్ని అందచేశారు. తమకు బాకీ పడిన 4,400 కోట్ల డాలర్ల బకాయిల చెల్లింపుపై చర్చించేందుకు ఐఎంఎఫ్‌ ప్రతినిధి వర్గం బ్యూనస్‌ ఎయిర్స్‌కు చేరుకున్నది. గత మాక్రీ సర్కారు చేసిన ఈ రుణం ప్రస్తుత అల్బర్టో ఫెర్నాండెజ్‌ సర్కారుకు పెను సవాలుగా మారుతోంది. ఈ రుణాన్ని తిరిగి చెల్లించేందుకు వీలుగా తమ దేశం అభివృద్ధి చెందాల్సిన అవసరం ఉన్నదని ఆయన ఐఎంఎఫ్‌నకు స్పష్టం చేస్తున్నారు.
