న్యూఢిల్లీ : గూడ్స్ అండ్ సర్వీసెస్ టాక్స్ (జీఎస్టీ) పై సుప్రీంకోర్టు గురువారం సంచలన తీర్పు వెలువరించంది. జీఎస్టీ కౌన్సిల్ సిఫార్సులకు కేంద్ర, రాష్ట్ర ప్రభుత్వాలు కట్టుబడాల్సిన అవసరం లేదని జస్టిస్ చంద్రచూడ్ నేతృత్వంలోని ధర్మాసనం స్పష్టం చేసింది.  జిఎస్‌టిపై చట్టాన్ని రూపొందించడానికి పార్లమెంటు, రాష్ట్ర శాసనసభలు సమానమైన, ఏకకాల అధికారాలను కలిగి ఉంటాయని తెలిపింది. అలాగే రెండు ఫెడరల్ యూనిట్లు నిర్దేశించిన చట్టాల మధ్య విరుద్ధమైన సందర్భంలో కౌన్సిల్ తగిన సలహా ఇవ్వగలదని కోర్టు పేర్కొంది. ఆర్టికల్ 246A, 279 కింద ఉన్న నిబంధనలు పన్నుల విషయాలపై చట్టాలు చేయడానికి రాష్ట్రాలు, కేంద్రాలకు సమాన అధికారాలు ఉన్నాయని పేర్కొంది.  ఒకరి ఆదేశాలను మరొకరిపై బలవంతంగా రుద్దొద్దని తేల్చి చెప్పింది. కేంద్ర, రాష్ట్రాలకు సమాన అధికారాలున్నాయని చెబుతూనే కేంద్ర, రాష్ట్ర ప్రభుత్వాల మధ్య చర్చలు అవసరమని సూచించింది.
       ఇంటిగ్రేటెడ్ గూడ్స్ అండ్ సర్వీసెస్ టాక్స్ చట్టం ప్రకారం సముద్ర రవాణాపై పన్ను విధించడానికి సంబంధించి గుజరాత్ హైకోర్టు నిర్ణయానికి వ్యతిరేకంగా చేసిన అప్పీల్‌పై సుప్రీంకోర్టు తీర్పునిచ్చింది. ఓడలో వస్తువుల రవాణా సేవలపై 5శాతం ఐజిఎస్‌టి విధించాలని 2017లో ప్రభుత్వం చేసిన నోటిఫికేషన్‌ను హైకోర్టు రద్దు చేసింది. హైకోర్టు తీర్పును ఈరోజు సుప్రీంకోర్టు సమర్థించింది.