న్యూఢిల్లీ: కేంద్ర ఎన్నికల కమిషన్ ఆదేశాలను ఉల్లంఘించిన కేసులో ఆరుగురు పోలీసు అధికారులపై బదిలీ వేటు విధించింది. ఉత్తరప్రదేశ్‌లోని మెయిన్‌పురి పార్లమెంటరీ నియోజకవర్గంలో జరుగుతున్న ఉపఎన్నికలకు సంబంధించి పోలీసు అధికారుల బదిలీలు, పోస్టింగ్‌లపై ఆదేశాలను ఉల్లంఘించినందుకు మెయిన్‌పురి, ఇటావా సీనియర్ పోలీసు సూపరింటెండెంట్‌ల నుంచి ఎన్నికల సంఘం వివరణ కోరింది. మీపై క్రమశిక్షణా చర్యలు ఎందుకు ప్రారంభించకూడదో కారణం చూపాలని పోల్ ప్యానెల్ ఎస్పీలను కోరింది.మెయిన్‌పురిలోని వారి సంబంధిత పోలీస్ స్టేషన్ల నుంచి ఆరుగురు పోలీసు సబ్-ఇన్‌స్పెక్టర్లను తక్షణమే రిలీవ్ చేయాలని కమిషన్ ఆదేశించింది.
ఉప ఎన్నికలు జరగనున్న అన్ని నియోజకవర్గాల్లో స్వేచ్ఛగా, నిష్పక్షపాతంగా, ప్రశాంతంగా ఎన్నికలు జరిగేలా చూడాలని పోల్ ప్యానెల్ ఉత్తరప్రదేశ్ చీఫ్ ఎలక్టోరల్ ఆఫీసర్‌ను ఆదేశించింది.మెయిన్‌పురిలోని వివిధ అసెంబ్లీ సెగ్మెంట్లలో సబ్-ఇన్‌స్పెక్టర్లు సురేష్ చంద్, కదిర్ షా, సుధీర్ కుమార్, సునీల్ కుమార్, సత్య భాన్, రాజ్ కుమార్ గోస్వామిలను వారి పోలీస్ స్టేషన్ల నుంచి తక్షణమే రిలీవ్ చేయాలని ఈసీ ఆదేశించింది. ముందస్తు అనుమతి లేకుండా వైద్‌పురా, భర్తానా, జస్వంత్ నగర్, చౌబియా పోలీస్ స్టేషన్‌లకు చెందిన నలుగురు స్టేషన్ హౌస్ ఆఫీసర్లకు దీర్ఘకాలిక సెలవులు మంజూరు చేసినందుకు క్రమశిక్షణా చర్యలు ఎందుకు ప్రారంభించకూడదో కారణం చూపాలని ఇటావా ఎస్‌ఎస్‌పిని ఈసీ కోరింది.
