నవతెలంగాణ-సిటీబ్యూరో
              టీఎన్జీవోస్‌ యూనియన్‌ హైదరాబాద్‌ జిల్లా అధ్యక్షులు డాక్టర్‌ ఎస్‌.ఎమ్‌.హుస్సేని(ముజీబ్‌) ఆధ్వర్యంలో శుక్రవారం తెలంగాణ రాష్ట్ర మైనార్టీ ఫైనాన్స్‌ కార్సొరేషన్‌ చైర్మెన్‌ మొహమ్మద్‌ ఇంతియాజ్‌ ఇసాక్‌ని మర్యాదపూర్వకంగా కలిశారు. మైనార్టీ ఫైనాన్స్‌ కార్పొరేషన్‌లో ప్రభుత్వ నిబంధనల ప్రకారం పనిచేస్తున్న తాత్కాలిక ఉద్యోగుల సర్వీస్‌ రెగ్యులరైజేషన్‌, 2015, 2020 పీఆర్సీ బకాయిలు చెల్లించాలని ఈ సందర్భంగా ఆయనకు వినతిపత్రం సమర్పించారు. ప్రభుత్వం చేపడుతున్న సంక్షేమ పథకాలు ముఖ్యంగా ఫైనాన్స్‌ కార్పొరేషన్‌ ఉద్యోగుల పనితీరు చాలా అమోఘంగా ఉందని ఈ సందర్భంగా చైర్మెెన్‌ దృష్టికి తీసుకెళ్లారు. దీనిపై చైర్మెన్‌ సానుకూలంగా స్పందించి అతిత్వరలో ఉద్యోగుల సమస్యలు పరిష్కరిస్తామని హామీ ఇచ్చారు. కార్యదర్శి విక్రమ్‌ కుమార్‌, ఉపాధ్యక్షులు రాజ్‌కుమార్‌, తెలంగాణ స్టేట్‌ వక్ఫ్‌బోర్డు సభ్యులు సయ్యద్‌ ఇబ్రహీం, సయ్యద్‌ జలీల్‌ అహ్మద్‌, అసద్‌ తిరేమిజి, ఎండీ.అజాం, మైనార్టీ కార్పొరేషన్‌ ఉద్యోగులు పాల్గొన్నారు.