నవతెలంగాణ-కల్చరల్‌
ప్రఖ్యాత రంగస్థల ప్రయోక్తలు రసరంజని నాటక సంస్థ వ్యస్థపకులలో భాగస్వామ్యులు గరిమెళ్ల రామ్మూర్తి 86వ జయంతి, చాట్ల శ్రీరాములు 91వ జయంతి ఉత్సవం డిసెంబర్‌ 5న రవీంద్రభారతి ప్రధాన వేదికపై రసరంజని నిర్వహణలో జరుగనుంది. ఇందుకు సంబంధించిన వివరాలు బుధవారం మాసబ్‌ ట్యాంక్‌ వద్దనున్న ప్రభుత్వ సలహాదారు డాక్టర్‌ కేవీ రమణ నివాస కార్యాలయంలో సంస్థ అధ్యక్షులు డాక్టర్‌ రమణ కార్యదర్శి ముట్నూరి కామేశ్వర రావుతో కలిసి విలేకరుల సమావేశంలో తెలిపారు. డిసెంబర్‌ 5న నిర్వహించే జయంతి వేడుకల్లో గరిమెళ్ల రామ్మూర్తి రంగస్థల పురస్కారంగా నటి తెలుగు విశ్వవిద్యాలయంలో రంగస్థల విభాగం ఆచార్యులు అన్నలూరి కల్యాణికి రూ. పది వేలతో సత్కరిస్తున్నట్లు తెలిపారు. అదే వేదికపై చాట్ల శ్రీరాములు థియేటర్‌ ట్రస్ట్‌తో కలసి చాట్ల ప్రతిభా పురస్కారంగా రంగస్థల కళాకారుడు నిట్టల శ్రీరామమూర్తికి ఇరవై వేల నగదుతో సత్కరిస్తున్నట్లు తెలిపారు. ఈ సందర్భంగా సాధినేని శ్రీజ దర్శకత్వంలో సందడే సందడి నాటిక ప్రదర్శిస్తారు. విలేకరుల సమావేశంలో మోహన్‌ సేనాపతి, శర్మ, కోటేశ్వర రావు తదితరులు పాల్గొన్నారు.
