- రాష్ట్ర ఆర్థిక, వైద్య ఆరోగ్య శాఖ మంత్రి టీ హరీష్‌ రావు
- కలెక్టర్లతో వీడియో కాన్ఫరెన్స్‌
నవ తెలంగాణ - వనపర్తి
            'కంటివెలుగు' కార్యకమ్రాన్ని పకడ్బందీగా అమలు చేయాలని రాష్ట్ర ఆర్థిక వైద్య, ఆరోగ్య శాఖ మంత్రి తన్నీరు హరీష్‌రావు ఆదేశించారు. సోమవారం మంత్రి ఖమ్మం కలెక్టర్‌ కార్యాలయం నుంచి , రాష్ట్ర సీఎస్‌ శాంతికుమారి , డీజీపీ అంజనీకుమార్‌ వైద్య, ఆరోగ్యశాఖ ప్రిన్సిపాల్‌ సెక్రటరీ రిజ్వి, కమిషనర్‌ శ్వేత మహంతి హైదరాబాద్‌ బీఆర్కె భవన్‌ నుంచి కంటి వెలుగు క్యాంపుల నిర్వహణ పట్ల తీసుకోవాల్సిన చర్యలపై అన్ని జిల్లాల కలెక్టర్‌లతో వీడియో కాన్ఫరెన్స్‌ నిర్వహించారు. జిల్లా కలెక్టరేట్‌ వీడియో సమావేశ మందిరం నుంచి జిల్లా కలెక్టర్‌ షేక్‌ యాస్మిన్‌ ఈ సమీక్షలో పాల్గొన్నారు. రాష్ట్ర వైద్య, ఆరోగ్యశాఖ మంత్రి మాట్లాడుతూ జనవరి 19 నుంచి జిల్లాలలో కంటివెలుగు కార్యక్రమాన్ని ప్రారంభించాలన్నారు.సీఎం కేసీఆర్‌ అత్యంత ప్రతి ష్టాత్మ కంగా కంటివెలుగు కార్యక్రమాన్ని అమలు చేస్తున్నారన్నారు. కంటివెలుగు శిబిరాల నిర్వాహణ సమయంలో ఎలాంటి అవాంచనీయ సంఘటనలు జరగకుండా పోలీసులు తగిన భద్రత చర్యలు కల్పించాలన్నారు. జనవరి 18న ఖమ్మంలో సీఎం కేసీఆర్‌ కంటి వెలుగు కార్యక్రమాన్ని లాంచనంగా ప్రారంభిస్తారని పేర్కొన్నారు. జిల్లాలలో 19న ఉదయం 9 గంటలకు మంత్రులు, ఎమ్మెల్యేలు, శాసనమండలి సభ్యులు, జెడ్పీ చైర్మన్లు జెడ్పీటీసీ, ఎంపీటీసీ, సర్పంచులుల పరిధిలో కంటి వెలుగుకార్యక్రమాన్ని ప్రారంభించాలని ఆదేశించారు. ో కలెక్టర్‌, డీఎంహెచ్‌ఓ వాట్సాప్‌ ద్వారా ప్రతి బృందం సకాలంలో క్యాంపులు ప్రారంభించేలా పర్యవేక్షణ చేయా లన్నారు. ఉదయం 8-45 వరకు తప్పనిసరిగా బృందాల సభ్యులు క్యాంపు లోకేషన్‌ చేరుకోవాలని మంత్రి స్పష్టం చేశారు. కంటివెలుగు క్యాంపులు విజయవంతం చేసేందుకు పంచాయతీ కార్యదర్శులు, అంగన్వాడీ టీచర్లు, ఆశా కార్యకర్తలు, ఆర్‌పీలు, వీఓఏలను భాగస్వామ్యం చేయాలని సూచించారు. క్యాంపు నిర్వహణ ముందస్తు సమాచారం ప్రజలకు తెలియజేసి ప్రతి ఇంటికి ఆహ్వాన పత్రిక అందించాలని పేర్కొన్నారు. ప్రతి వైద్య బృందానికి క్యాంపు నిర్వహణ కోసం అవసరమైన సామాగ్రి, మందులు, కళ్లద్దాలు అందించేలా చర్యలు తీసుకోవాలని ఆదేశించారు. కంటివెలుగు శిబిరాలకు వచ్చే ప్రజలు తప్పనిసరిగా ఆధార్‌ కార్డు తీసుకుని వచ్చే విధంగా అవగాహన కల్పించాలన్నారు. గ్రామాల్లో క్యాంపుల నిర్వహణ కంటే ముందుగా సంబంధిత ఆశా, ఏఎన్‌ఎంలు పర్యటించి షెడ్యూల్‌ వివరాలు తెలియజేస్తూ కంటివెలుగు పై అవగాహన కల్పించేలా చర్యలు తీసుకోవాలని ఆదేశించారు. జిల్లాలో ఉన్న ఎంపీఓ, ఎంపీడీఓలు, తహసీల్దార్‌లు, మండల ప్రత్యేక అధికారి రోజూ వారి పరిధిలోని శిబిరాలను తనిఖీ చేయాలని అభిప్రాయపడ్డారు. జిల్లా స్థాయిలో డీిఎంహెచ్‌ఓ, ప్రోగ్రాం అధికారులు విస్తృతంగా పర్యటిస్తూ క్యాంపుల నిర్వహణను తనిఖీ చేయాలని ఆదేశించారు. వీడియో కాన్ఫరెన్స్‌లో పాల్గొన్న సీఎస్‌శాంతి కుమారి మాట్లాడుతూ ప్రభుత్వం అత్యంత ప్రతిష్టాత్మకంగా చేపడ్తున్న కంటివెలుగు కార్యక్రమంలో కలెక్టర్లు అప్రమత్తంగా ఉండాలన్నారు. ప్రణాళిక బద్ధంగా ప్రజలు క్యాంపులో పాల్గొని కంటి పరీక్షలు నిర్వహించుకునేలా చర్యలు తీసుకోవాలని సూచించారు. గతంలో కంటే బృందాల సంఖ్యను రెట్టింపు చేసినందున అధికంగా ప్రజలకు కంటివెలుగు శిబిరాలు అందుబాటులో వచ్చే విధంగా అధికారులు పనిచేయాలని, ప్రజల సౌకర్యార్థంగా అవసరమైన ఏర్పాట్లు చేయాలన్నారు. వీడియో కాన్ఫరెన్స్‌ అనంతరం జిల్లా కలెక్టర్‌ షేక్‌ యాస్మీన్‌ భాష సంభందిత అధికారులతో మాట్లాడుతూ జిల్లాలో కంటి వెలుగు క్యాంపుల షెడ్యూల్‌ తెలియజేస్తూ అవసరమైన భద్రత కల్పించాలని పోలీస్‌ శాఖ అధికారులకు కలెక్టర్‌ సూచించారు. జిల్లాలో మున్సిపాలిటి , మండల్‌, గ్రామ పంచాయతీల వారీగా శిబిరాల నిర్వాహణ షెడ్యూల్‌ సంబందిత ప్రజాప్రతినిధులకు అందజేయాలని కలెక్టర్‌ సూచించారు. ఈ వీడియో కాన్ఫరెన్స్‌ లో జిల్లా కలెక్టర్‌ షేక్‌ యాస్మిన్‌ భాష, స్థానిక సంస్థల అదనపు కలెక్టర్‌ ఆశిష్‌ సంగ్వాన్‌,ఎస్పీ అపూర్వ రావు, జిల్లా వైద్య ఆరోగ్య శాఖ అధికారి డాక్టర్‌ రవిశంకర్‌, జిల్లా పంచాయతి అధికారి సురేష్‌, ఏఓ. సాయినాథ్‌, మున్సిపల్‌ కమిషనర్లు, సంబంధిత అధికారులు పాల్గొన్నారు.