- ఒక్క ఏడాదిలో 23లక్షల మరణాలు
- ఉత్తరాది రాష్ట్రాల్లో తీవ్రస్థాయిలో పరిశ్రమల కాలుష్యం : 'ది లాన్సెట్‌' అధ్యయనంలో వెల్లడి
న్యూఢిల్లీ : అన్నిరకాల కాలుష్యాల కారణంగా భారత్‌లో ఒక్క (2019) ఏడాదిలోనే 23లక్షల అకాల మరణాలు సంభవించినట్టు తాజా నివేదిక వెల్లడించింది. వీటిలో 16లక్షల మంది కేవలం వాయు కాలుష్యం వల్లే మరణించినట్టు తెలిపింది. ప్రపంచవ్యాప్తంగా 2019లో కాలుష్యం కారణంగా 90లక్షల మంది ప్రాణాలు కోల్పోగా ఇతర దేశాలతో పోలిస్తే భారత్‌లోనే ఎక్కువ మంది చనిపోయినట్టు పేర్కొన్నది. ఇలా ఓవైపు ప్రాణనష్టంతోపాటు అకాల మరణాలతో ఆ ఏడాదిలో ప్రపంచానికి 4.6 లక్షల కోట్ల డాలర్ల ఆర్థిక నష్టం వాటిల్లిందని అంచనావేసింది. ఇందుకు సంబంధించిన తాజా అధ్యయనం 'ది లాన్సెట్‌' జర్నల్‌లో ప్రచురితమైంది.
ప్రతి ఆరు మరణాల్లో ఒకటి
విశ్వవ్యాప్తంగా ప్రతి ఆరు మరణాల్లో ఒకటి కాలుష్యం కారణంగానే సంభవిస్తున్నట్టు తాజా నివేదిక వెల్లడించింది. కేవలం వాయు కాలుష్యం కారణంగానే ప్రపంచంలో ఒక్క ఏడాదే 66లక్షల మంది బలయ్యారు. నీటి కాలుష్యంతో 13లక్షలు, సీసం కారణంగా తొమ్మిది లక్షలతోపాటు మరో 8.7 లక్షల మందిఇతర విషపూరితవాయువుల కారణంగా చనిపోయారు. ఇక భారత్‌లో వాయు కాలుష్యం కార ణంగా మరణించిన వారిలో అత్యధికంగా 9.8లక్షల మంది పీఎం 2.5వల్లే అకాల మరణం చెందారు.
ఉత్తరాదిలోనే ఎక్కువ
భారత్‌లో ముఖ్యంగా ఉత్తరాదిన ఈ కాలుష్య ప్రభావం అధికంగా అధికంగా ఉందని తాజా నివేదిక గుర్తుచేసింది. విద్యుత్తు, రసాయన పరిశ్రమలు, వ్యవసాయ కార్యకలాపాల వల్ల వాయు కాలుష్యం అక్కడ తీవ్రంగా ఉందని పేర్కొంది. ఇండ్లలో వంట చెరకు మండించడం భారీ స్థాయిలో వాయు కాలుష్య మరణాలకు కారణంగా నిలుస్తోందని తెలిపింది. వీటితోపాటు బొగ్గు, పంట వ్యర్థాలను కాల్చడం వంటివి తర్వాతి స్థానాల్లో ఉన్నట్టు తెలిపింది. కాలుష్య నియంత్రణకు భారత్ ప్రయత్నాలు చేస్తున్నప్పటికీ దేశవ్యాప్తంగా సరైన కేంద్రీకృత వ్యవస్థ లేదన్న విషయాన్ని అధ్యయనం ఎత్తిచూపింది. భారత్‌లో ప్రమాదకర పీఎం 2.5 స్థాయిలు డబ్ల్యూహెచ్‌వో మార్గదర్శకాల కంటే చాలా అధికంగా ఉన్నాయంటూ అప్రమత్తం చేసింది.
ప్రజా ఆరోగ్యంపై తీవ్ర ప్రభావం
ప్రజా ఆరోగ్యంపై కాలుష్యం ప్రభావం అధికంగా ఉందని, తక్కువ, మధ్య ఆదాయ దేశాలపై ఈభారం మరింత ఎక్కువగా ఉందని అధ్యయనానికి నేతృత్వం వహించిన స్విట్జర్లాండ్‌కు చెంది గ్లోబల్‌ అలయన్స్‌ ఆన్‌ హెల్త్‌ అండ్‌ పొల్యూషన్‌ నిపుణులు రిచర్చ్‌ ప్యుల్లర్‌ పేర్కొన్నారు. ఇది అత్యంత తీవ్రమైన విషయమైనప్పటికీ కాలుష్యాన్ని నివారించడంలో అంతర్జాతీయ స్థాయిలో పట్టించుకోవడం లేదన్నారు. అయితే వీటిపై ప్రజల్లో అవగాహన తేవడంలో ఇటీవల పురోగతి సాధించినప్పటికీ వాటికి అవసరమైన నిధులు కేటాయింపులో పెరుగుదల నామమాత్రంగానే ఉందన్నారు.
