- 'ఎయిమ్స్‌' విషయంలో మోడీ సర్కారు తీరు
- బీజేపీ పాలనలో ఇలాంటి సంస్థలు మూడింతలయ్యాయని గొప్పలు
- ఇప్పటికీ ఏ ఒక్క ఇన్‌స్టిట్యూట్‌ కూడా పూర్తిస్థాయిలో పని చేయని వైనం
- పరిమితంగానే సేవలు..మానవ వనరుల కొరత
- సరిపడా ఫ్యాకల్టీ, వైద్యులు, నర్సులు, మెడికల్‌ స్టాఫ్‌ లేక సతమతం
- పార్లమెంటులో కేంద్ర ఆరోగ్య మంత్రి సమాచారం
           దేశవ్యాప్తంగా ఎయిమ్స్‌ వంటి సంస్థల ఏర్పాటు విషయంలో మోడీ సర్కారు తీవ్రంగా ప్రచారాలు చేసుకుంటున్నది. ఎన్నికలు జరుగనున్న రాష్ట్రాల్లో వీటి గురించి చెప్పుకుంటూ రాజకీయంగా లబ్ది పొందాలని చూస్తున్నది. తమ పాలనలో ఈ ఇన్‌స్టిట్యూట్‌ల సంఖ్య మూడింతలు పెరిగిందని వెల్లడించింది. అయితే ఇప్పటి వరకూ వీటిలో ఏ ఒక్కటీ పూర్తి స్థాయి సేవలను అందిండం లేదు. సాక్షాత్తూ కేంద్ర ఆరోగ్య మంత్రి ఈ విషయాన్ని పార్లమెంటులో వెల్లడించారు. ప్రతిష్టాత్మకంగా ఏర్పాటు చేసిన ఈ సంస్థల ద్వారా ప్రజలకు ఉపయోగం చేకూరకపోవడంపై ఆరోగ్య నిపుణులు, విశ్లేషకులు ఆందోళన వ్యక్తం చేశారు.
న్యూఢిల్లీ : త్వరలో అసెంబ్లీ ఎన్నికలు జరగనున్న కర్నాటక రాష్ట్రంలో ఇటీవల పర్యటించిన ప్రధాని మోడీ ఎయిమ్స్‌ అంశాన్ని ప్రస్తావించారు. తమ ప్రభుత్వం దేశంలో ఏయిమ్స్‌ లాంటి సంస్థలను మూడు రెట్లు పెంచిందని తెలిపారు. ఈనెల 13న మాండ్యలో పర్యటించిన ఆయన ఒక సభలో ప్రసంగిస్తూ చెప్పారు. దీనిపై కేంద్ర ఆరోగ్య మంత్రి మన్సూఖ్‌ మాండవీయ సైతం ట్వీట్‌ చేశారు. మోడీ జమానాలో ఎయిమ్స్‌ వంటి సంస్థలు ఏడు నుంచి 22కు పెరిగాయని పేర్కొన్నారు. అయితే, ఇదే ఆరోగ్య మంత్రి ఎయిమ్స్‌ వంటి సంస్థల పనితీరు విషయంలో పార్లమెంటులో చేసిన ప్రకటన ఆశ్చర్యం కలిగించక మానదు. 2014లో మోడీ కేంద్రంలో అధికారంలోకి వచ్చిన తర్వాత ఏర్పాటైనఇలాంటి సంస్థల్లో ఇప్పటి వరకు ఏ ఒక్కటీ పూర్తి స్థాయిలో పని చేయటం లేదని బడ్జెట్‌ సమావేశాల్లో వెల్లడించారు.
పూర్తి స్థాయిలో
పని చేస్తున్నవి ఆ ఆరు మాత్రమే
లోక్‌సభలో కేంద్ర ఆరోగ్య మంత్రి వెల్లడించిన లిఖిత పూర్వక సమాధానం ప్రకారం.. ప్రధాన మంత్రి స్వాస్థ్య సురక్ష యోజన (పీఎంఎస్‌ఎస్‌వై) కింద 2014 నుంచి ఏయిమ్స్‌ వంటి 16 సంస్థలు ఏర్పాటయ్యాయి. ఈ సంస్థలు 'వివిధ దశల కార్యచరణ'లో ఉన్నాయి. పరిమిత ఔట్‌-పేషెంట్‌ డిపార్ట్‌మెంట్‌ (ఓపీడీ) మరియు ఇన్‌పేషెంట్‌ డిపార్ట్‌మెంట్‌ (ఐపీడీ) సేవలు మాత్రమే అందుబాటులో ఉన్నాయి. పూర్తి స్థాయిలో ఈ సంస్థలు సేవలను అందించటం లేదు. అయితే, మోడీ సర్కారు కేంద్రంలో రావడానికి ముందు దేశంలో ఉన్న భోపాల్‌, పాట్న, రారుపూర్‌, రిషికేశ్‌, భువనేశ్వర్‌, జోధ్‌పూర్‌లోని ఎయిమ్స్‌ లాంటి సంస్థలే పూర్తి స్థాయిలో పని చేస్తుండటం గమనార్హం.
మూడేండ్లు గడిచినా ఓపీడీ,
ఐపీడీ సేవలు లేవు
పరిమిత ఓపీడీ, ఐపీడీ సర్వీసులను ప్రభుత్వం నిర్వచించలేదనీ, దీనిపై వివరణ అవసరమని ఆరోగ్య నిపుణులు తెలిపారు. సంస్థలకు సంబంధించిన ప్రస్తుత స్థితి గురించి తెలియాలంటే వీటి ద్వారా సేవలు పొందిన రోగుల గణాంకాలను ప్రభుత్వం ఇవ్వాల్సి ఉంటుందని పబ్లిక్‌ హెల్త్‌ ఫెడరేషన్‌ ఆఫ్‌ ఇండియా గౌరవ ఆచార్యులు కె. శ్రీకాంత్‌ రెడ్డి అన్నారు. ఎయిమ్స్‌ గువహతి (అసోం) ఏర్పాటై మూడేండ్లు గడిచిన సందర్భంగా ఇటీవలే వేడుకలు నిర్వహించారు. అయితే ఇందులో ఓపీడీ, ఐపీడీ సేవలేవీ అందుబాటులో లేకపోవడం గమనార్హం. ఇన్‌స్టిట్యూట్‌లో కనీసం ఒక్క క్లినికల్‌ డిపార్ట్‌మెంట్‌ కూడా నడవడంలేదు. సదరు సంస్థ వెబ్‌సైట్‌లోనే ఈ విషయం పొందుపర్చబడింది. 2017లో ప్రధాని మోడీ చేతుల మీదుగా ఈ సంస్థ శంఖుస్థాపన జరిగింది.
మానవ వనరులు అసరం
ఈ ఇన్‌స్టిట్యూట్‌ల ఏర్పాటు, నడిపే బాధ్యత కేంద్రానిదే. అయితే, రాష్ట్ర ప్రభుత్వాలు కూడా వీటిలో తమ పాత్ర పోషించాల్సి ఉంటుందని కేంద్ర మంత్రి తన లిఖితపూర్వక సమాధానంలో పేర్కొనడం గమనార్హం. ఈ సంస్థలు పూర్తిస్థాయిలో పని చేయాలంటే అధ్యాపకలు, రెసిడెంట్‌ డాక్టర్లు, నర్సులు వంటి మానవ వనరులు కావాలని నేషనల్‌ హెల్త్‌ సిస్టమ్స్‌ రీసోర్స్‌ సెంటర్‌ మాజీ హెడ్‌ టి. సుందరరామన్‌ తెలిపారు. ఫ్యాకల్టీ కొరతనే ఈ ఆస్పత్రులు, కాలేజీలల ప్రస్తుత పనితీరుకు కారణమై ఉండొచ్చని శ్రీకాంత్‌రెడ్డి, సుందరరామన్‌ అన్నారు.
మంజూరైన పోస్టుల్లో కొన్ని మాత్రమే భర్తీ
గతేడాది డిసెంబర్‌లో రాజ్యసభలో కేంద్ర ఆరోగ్య శాక సహాయ మంత్రి భర్తి ప్రవీణ్‌ ఇచ్చిన సమాధానం ప్రకారం.. ఈ 16 ఇన్‌స్టిట్యూషన్‌లలో ఫ్యాకల్టీ సభ్యుల కొరత ఉండటం గమనార్హం. ఫ్యాకల్టీయేతర పోస్టుల కొరత ఇంకా దారుణంగా ఉన్నది. ఉదాహరణకు.. ఏయిమ్స్‌ గువహతికి మంజూరైన పోస్టులు 1026కాగా.. 95 పోస్టులు మాత్రమే భర్తీ చేయబడటం గమనార్హం.
ఆంధ్రప్రదేశ్‌లోని ఎయిమ్స్‌(మంగళగిరి)కు మంజూరైన 1054 పోస్టులకు గానూ 474 పోస్టులు మాత్రమే భర్తీ కావడం ఇలాంటి సంస్థలో నెలకొన్న పరిస్థితులకు అద్దం పడుతున్నదని వైద్యారోగ్య నిపుణులు, విశ్లేషకులు అన్నారు. పూర్తి స్థాయిలో పని చేయనీ, సదుపాయాలు లేని ఇలాంటి సంస్థల ఏర్పాటుతో లాభమేమిటని ప్రశ్నించారు.