రవితేజ హీరోగా, సుధీర్‌ వర్మ దర్శకత్వంలో అభిషేక్‌ నామా నిర్మిస్తున్న యాక్షన్‌ థ్రిల్లర్‌ చిత్రం 'రావణాసుర'. అభిషేక్‌ పిక్చర్స్‌, ఆర్టీ టీమ్ వర్క్స్‌ బ్యానర్స్‌ పై తెరకెక్కుతున్న ఈ చిత్రం భోగి సందర్భంగా శుక్రవారం సినీ, రాజకీయ ప్రముఖుల సమక్షంలో అన్నపూర్ణ స్టూడియోలో అంగరంగ వైభవంగా ప్రారంభమైంది. పూజా కార్యక్రమాలు అనంతరం దర్శకేంద్రుడు కె. రాఘవేంద్ర రావు స్క్రిప్ట్‌ అందించారు. రవితేజ పై చిత్రీకించిన ముహూర్తపు సన్నివేశానికి ముఖ్య అతిథిగా విచ్చేసిన చిరంజీవి క్లాప్‌ నివ్వగా, సినిమాటోగ్రఫీ మంత్రి తలసాని శ్రీనివాస్‌ యాదవ్‌ కెమెరా స్విచాన్‌ చేశారు. దర్శకులు కె.యస్‌.రవీంద్ర (బాబీ), గోపీచంద్‌ మలినేని గౌరవ దర్శకత్వం వహించారు. శ్రీకాంత్‌ విస్సా కథ, స్క్రీన్‌ ప్లే, మాటలు అందిస్తున్న ఈ చిత్రంలో యువ కథానాయకుడు సుశాంత్‌ కీలక పాత్రలో రామ్‌గా నటిస్తుండగా, అను ఇమ్మాన్యుయేల్‌, మేఘా ఆకాష్‌ , ఫరియా అబ్దుల్లా, దక్ష నగార్కర్‌, పూజిత పొన్నాడ హీరోయిన్లుగా నటిస్తున్నారు. ఈ నెలలోనే రెగ్యులర్‌ చిత్రీకరణ జరగనుంది. ఇంతకు ముందు ఎన్నడూ చూడని విధంగా రవితేజని డిఫరెంట్‌ క్యారెక్టర్‌లో దర్శకుడు సుధీర్‌ వర్మ ప్రజెంట్‌ చేయనున్నారు. ప్రీ- ప్రొడక్షన్‌ స్టేజ్‌ లోనే ''రావణా సుర'' చిత్రం బిగ్గెస్ట్‌ హిట్‌ కానుందని టాక్‌ వినిపిస్తోందని చిత్ర బృందం సంతోషం వ్యక్తం చేసింది.ఈ చిత్ర పోస్టర్‌ను చిరంజీవి లాంచ్‌ చేశారు. ఈ పోస్టర్‌లో రవితేజ కనిపిస్తున్న తీరు సినిమాపై మరిన్ని అంచనాలను పెంచుతోంది. అలాగే సెప్టెంబర్‌ 30న ఈ చిత్రాన్ని ప్రపంచవ్యాప్తంగా విడుదల చేయబోతున్నట్టు పోస్టర్‌లో ఉండటం విశేషం. రావు రమేష్‌, మురళీ శర్మ, సంపత్‌ రాజ్‌, నితిన్‌ మెహతా, సత్య, జయప్రకాష్‌, తదితరులు నటిస్తున్న ఈచిత్రానికి కథ, స్క్రీన్‌ ప్లే, మాటలు: శ్రీకాంత్‌ విస్సా, సంగీతం: హర్షవర్ధన్‌ రామేశ్వర్‌, భీమ్స్‌, కెమెరా : విజరు కార్తీక్‌ కన్నన్‌, ఎడిటర్‌ : శ్రీకాంత్‌, నిర్మాత: అభిషేక్‌ నామా, ప్రొడక్షన్‌ డిజైనర్‌: డి.ఆర్‌.కె కిరణ్‌, సిఈఓ: పోతిని వాసు, మేకప్‌ చీఫ్‌ :ఐ. శ్రీనివాస్‌ రాజు, దర్శకత్వం : సుధీర్‌ వర్మ.
