ఆర్‌.కె.ఫిలింస్‌ పతాకంపై లయన్‌ డా.ప్రతాని రామకష్ణ గౌడ్‌ ముఖ్య పాత్రలో నటిస్తూ, నిర్మిస్తున్న చిత్రం 'కంచుకోట'. రహస్యం అనేది ట్యాగ్‌ లైన్‌. హీరో రాజశేఖర్‌ మేనల్లుడు మదన్‌ హీరోగా పరిచయం అవుతుండగా, ఆశ, దివ్య హీరోయిన్లుగా నటిస్తున్నారు. ఎమ్‌.ఎ చౌదరి, డా.వంశీ దర్శకులు.
ఒక పాట మినహా ఈ సినిమా చిత్రీకరణ పూర్తి చేసుకుంది. నేడు (బుధవారం) ప్రతాని రామకష్ణ బర్త్‌ డే సందర్భంగా మంగళవారం ఫిలించాంబర్‌లో ఈ చిత్ర టైటిల్‌ లాంచ్‌ చేశారు.
ఈ కార్యక్రమానికి ముఖ్య అతిథిగా విచ్చేసిన ప్రొడ్యూసర్‌ కౌన్సిల్‌ సెక్రటరి మోహన్‌ వడ్లపట్ల మాట్లాడుతూ, 'ఎన్టీఆర్ గారు నటించిన 'కంచుకోట' చిత్రం ఎంత పెద్ద విజయం సాధించిందో అందరికీ తెలిసిందే. అదే టైటిల్‌తో ఆర్‌.కె.గౌడ్‌గారు నిర్మిస్తున్న ఈ చిత్రం ఘన విజయం సాధించాలి' అని అన్నారు. 'ఓ పక్క టిఎఫ్‌సీసీ చైర్మన్‌గా ఎన్నో గొప్ప కార్యక్రమాలు చేస్తూనే మరో పక్క 'కంచుకోట'లాంటి మంచి సినిమాలు తీస్తున్న ఆర్‌.కె.గౌడ్‌గారికి అభినందనలు' అని టియఫ్‌సీసీ వైస్‌ చైర్మన్‌ ఏ.గురురాజ్‌ చెప్పారు.
దర్శకుడు వి.సముద్ర మాట్లాడుతూ, 'నందమూరి తారకరామారావు గారు నటించిన 'కంచుకోట' స్థాయిలోనే ఈ సినిమా భారీ విజయాన్ని అందుకోవాలి' అని తెలిపారు. 'మంగ్లీ పాడిన ఒక పాట మినహా చిత్రీకరణ మొత్తం పూర్తయింది. త్వరలో ఆ పాటను వంశీ కొరియోగ్రఫీలో చిత్రీకరించనున్నాం. ఇదొక హిస్టారికల్‌ సినిమా. 40 శాతం గ్రాఫిక్‌ వర్క్‌ ఉంటుంది. ఇందులో నేను గురూజీ పాత్రలో నటించాను. హీరో రాజశేఖర్‌ గారి మేనల్లుడు మదన్‌ హీరోగా నటిస్తున్నాడు. అలాగే బ్రహ్మానందం, పథ్వీ, సత్యప్రకాశ్‌, నాగరాజు కీలక పాత్రలు పోషించారు. త్వరలో అన్ని కార్యక్రమాలు పూర్తి చేసి, వచ్చే నెలలో సినిమాను గ్రాండ్‌గా రిలీజ్‌ చేయడానికి ప్లాన్‌ చేస్తున్నాం. త్వరలోనే నట సార్వభౌమ ఎన్టీఆర్‌గారి శత జయంతి వేడుకలు ఘనంగా జరగబోతున్న నేపథ్యంలో మా 'కంచుకోట' టైటిల్‌ని లాంచ్‌ చేయటం హ్యాపీగా ఉంది' అని డా. ప్రతాని రామకష్ణ గౌడ్‌ అన్నారు.
