రామ్‌ తేజ్‌, గరిమ జంటగా రూపొందుతున్న నూతన చిత్ర షూటింగ్‌ శుక్రవారం ఫిలించాంబర్‌లో ప్రారంభమైంది. పీవీఆర్‌ ఆర్ట్స్‌ పతాకంపై ప్రొడక్షన్‌ నెం1గా అక్షయ్ కృష్ణ నల్ల దర్శకత్వంలో పీవీఆర్‌ నిర్మిస్తున్నారు. ఆనంద్‌ రాజ్‌ ఓంకారం ఎగ్జిక్యూటివ్‌ ప్రొడ్యూసర్‌గా వ్యవహరిస్తున్నారు.
ఈ చిత్ర ప్రారంభోత్సవానికి ముఖ్య అతిథులుగా విచ్చేసిన తెలంగాణ ఫిలించాంబర్‌ ఆఫ్‌ కామర్స్‌ ఛైర్మన్‌ డా.ప్రతాని రామకృష్ణ గౌడ్‌ ముహర్తపు సన్నివేశానికి క్లాప్‌కొట్టగా, నిర్మాత రామసత్యనారాయణ కెమెరా స్విచ్చాన్‌ చేశారు. ఈ సందర్భంగా మీడియాతో తెలంగాణ ఫిలిం ఛాంబర్‌ ఆఫ్‌ కామర్స్‌ ఛైర్మన్‌ డా.ప్రతాని రామకృష్ణ గౌడ్‌ మాట్లాడుతూ, 'నిర్మాత పీవీఆర్‌ ప్యాషన్‌తో ఈ సినిమా నిర్మిస్తున్నారు. దర్శకుడు అక్షరు కృష్ణకు ఫిలిం ఇండిస్టీలో ఎంతో అనుభవం ఉంది. కాన్సెప్ట్‌ బాగుంటే కొత్త, పాత, చిన్నా, పెద్ద అని చూడకుండా ప్రేక్షకులు సినిమాలను ఆదరిస్తున్నారు. అలాంటి మంచి కాన్సెప్ట్‌తో ఈ చిత్రం రూపొందుతోంది. తెలంగాణ ఫిలిం ఛాంబర్‌ తరఫున నా వంతు సాయం సినిమా రిలీజ్‌ సమయంలో చేస్తాను' అని అన్నారు. 'మంచి కంటెంట్‌తో తెరకెక్కుతున్న ఈచిత్రం విజయవంతం కావాలి'అని నిర్మాత రామ సత్యనారాయణ చెప్పారు.
దర్శకుడు అక్షయ్ కృష్ణ నల్ల మాట్లాడుతూ, 'కథ నచ్చి మా నిర్మాత పీవీఆర్‌ ఈ చిత్రాన్ని నిర్మించడానికి ముందుకొచ్చారు. ఎక్కడా రాజీ పడకుండా నిర్మించడానికి ప్లాన్‌ చేస్తున్నారు. మీడియా నేపథ్యంలో సినిమా ఉంటుంది. ప్రస్తుతం అమ్మాయిలపై ఎలాంటి అఘాయిత్యాలు జరుగుతున్నాయో చూస్తున్నాం.అలాంటి వాటిని మా హీరో ఎలా ఎదుర్కొన్నాడు అనేది కథాంశం. ప్రతి సన్నివేశం రియాలిటీకి దగ్గరగా ఉంటూ మంచి సందేశాన్ని అందించే ప్రయత్నం చేస్తున్నాం. అన్ని వర్గాలకు నచ్చే విధంగా సినిమా ఉంటుంది. త్వరలో చీరాలలో షూటింగ్‌ ప్రారంభిస్తాం' అని తెలిపారు. మధుప్రియ, కావ్య, అజరు ఘోష్‌, సుమన్‌, చిత్రం శ్రీను, నాగరాజు, రానా, నరేష్‌ నటిస్తున్న ఈ చిత్రానికి డిఓపి : శబరినాథ్‌, సంగీతం : రాజా, స్టంట్స్‌ :అశోక్‌ రాజ్‌, కృష్ణంరాజు, కొరియోగ్రాఫర్‌: బ్రదర్‌ ఆనంద్‌ అండ్‌ రాము, ఎగ్జిక్యూటివ్‌ ప్రొడ్యూసర్‌: ఆనంద్‌ రాజు ఓంకారం, నిర్మాత : పీవీఆర్‌, రచన-దర్శకత్వం : అక్షయ్ కృష్ణ నల్లం.
మా దర్శకుడు నాకు ఇరవై ఏళ్లుగా పరిచయం. సినిమా పరిశ్రమలో ఎంతో అనుభవం ఉన్నవాడు. సమాజంలో జరుగుతున్న అక్రమాలు, అన్యాయాలను ఓ సామాన్యుడు ఎలా ఎదుర్కొన్నాడు అనేది ముఖ్య పాయింట్‌. దీనికి ఆనంద్‌ రాజ్‌ పరిచయమైన అతి తక్కువ కాలంలో భాగస్వామిగా చేరారు. మంచి టీమ్‌తో ఈ సినిమా నిర్మిస్తున్నాం
- నిర్మాత పీవీఆర్‌
