తెలంగాణ సినిమా థియేటర్స్‌ ఎంప్లాయిస్‌ యూనియన్‌ రాష్ట్ర ప్రథమ మహాసభల పోస్టర్‌ను శుక్రవారం ఆవిష్కరించారు. ఈ సందర్భంగా రాష్ట్ర కార్యదర్శి కె. అరుణ్‌ మాట్లాడుతూ,'సినిమా యూనియన్‌ ప్రథమ మహాసభని ఈనెల 6వ తేదీన గోల్కొండ ఎక్స్‌ రోడ్‌లోని సిఐటియు కార్యాలయంలో నిర్వహిస్తున్నాం. సినిమా థియేటర్స్‌లో పనిచేసే కార్మికుల కనీస వేతనాల కోసం, ఉద్యోగ భద్రత కోసం ఐక్యతతో ముందుకు నడవాలి. ఈ 3 సంవత్సరాల కాలంలో కార్మికులకు సమస్యల పై చేసిన పోరాటాలను సమీక్షించుకుని, రాబోయే మూడు సంవత్సరాలకి కార్మికుల సమస్యల పరిష్కారం కోసం జరిగే పోరాటాల రూపకల్పన చేస్తాం. ఈ మహాసభలకు అన్ని జిల్లాల నుంచి ప్రతినిధులు హాజరవుతున్నారు. థియేటర్‌ కార్మికులు కార్మికులు పెద్ద ఎత్తున కదిలి రావాలని విజ్ఞప్తి చేస్తున్నాం' అని తెలిపారు. ఈ కార్యక్రమంలో రాష్ట్ర ఉపాధ్యక్షులు పి. పుల్లారావు, మేడ్చల్‌ జిల్లా అధ్యక్షులు జి.కమలాకర్‌తోపాటు సిఐటియు నాయకులు మల్లేష్‌ పాల్గొన్నారు.
