'హిట్‌ ది ఫస్ట్‌ కేస్‌' అనే క్రైమ్‌ థ్రిల్లర్‌తో దర్శకుడిగా తెరంగేట్రం చేసి టైటిల్‌కు తగ్గట్టే హిట్‌ సాధించారు శైలేష్‌ కొలను. ఇప్పుడు ఆయన 'హిట్‌ యూనివర్స్‌'ని రూపొందించారు. అందులో భాగంగా హిట్‌ సినిమాకు ఫ్రాంచైజీగా రూపొందిన మరో చిత్రం 'హిట్‌ 2 ది సెకండ్‌ కేస్‌'. ఈ చిత్రం ఇటీవల విడుదలై సక్సెస్‌ ఫుల్‌గా రన్‌ అవుతున్న సందర్భంగా చిత్రయూనిట్‌ విజయోత్సవ వేడుకను ఘనంగా నిర్వహించింది.
ఈ సందర్భంగా నాని మాట్లాడుతూ, ' 'సినిమా కోసం పని చేసిన ప్రతీ ఒక్కరికీ థ్యాంక్స్‌. పావని శ్రద్దగా, కోమలి వర్షగా చక్కగా నటించారు. ప్రొడక్షన్‌ డిపార్ట్మెంట్‌, ఎడిటర్‌ గ్యారీ, కెమెరామెన్‌ వెంకట్‌ వంటి వారు దొరకడం మా అదృష్టం. సినిమాలోని వయలెన్స్‌ను మీనాక్షి తన అందంతో బ్యాలెన్స్‌ చేసింది. శ్రీనాథ్‌ చక్కగా నటించారు. సుహాస్‌ అద్భుతంగా నటించాడు. నాకు తెలిసిన నటీనటుల్లో సుహాస్‌ గొప్ప నటుడు. సురేష్‌ బొబ్బిలి పాట బాగుంది. శ్రీలేఖ ఇచ్చిన 'ఉరికే ఉరికే' పాట నాకు ఎంతో ఇష్టం. మా సినిమా కోసం చారు బిస్కెట్‌ టీం చాలా కష్టపడింది. కష్టపడి ప్రిపేర్‌ అయ్యే బ్యాచ్‌లో శేష్‌ ఉంటాడు. నేను కాపీ కొట్టి పాస్‌ అయ్యే బాచ్‌లో ఉంటాను. నేను మ్యాజిక్‌ని నమ్ముతాను. కానీ శేష్‌ మాత్రం లాజిక్‌ను నమ్ముతాడు. అందుకే ఇలా కంటిన్యూగా సక్సెస్‌లు కొడుతున్నాడు. మంచి చిత్రాలు తీస్తే తెలుగు ప్రేక్షకులు చూస్తారు అని మరోసారి నిరూపించారు' అని అన్నారు.
'ఉదయం నుంచి ఫోన్‌ మోగుతూనే ఉంది. అప్పటికే మహేష్‌ బాబు గారివి మూడు మిస్డ్‌ కాల్స్‌ ఉన్నాయి. వెంటనే నేను కాల్ చేశాను. నిన్ను చూసి గర్వపడుతున్నాను శేష్‌ అన్నారు. నాకు వెంటనే కళ్ళలో నీళ్లు తిరిగాయి. నీకు ఎప్పుడూ నేను అన్నలా అండగా ఉంటాను అని అన్నారు. నాకు ఆ మూమెంట్‌ ఎంతో స్పెషల్‌గా అనిపించింది. అదే నిజమైన సక్సెస్‌ అని అర్థమైంది. నేను ఇంత వరకు పని చేసిన ప్రొడక్షన్‌ కంపెనీల్లో ప్రశాంతి, నాని ప్రొడక్షన్‌లది ది బెస్ట్‌. నేను ఓ చిన్న మాట చెబితే చేస్తారని నాకు ఇప్పుడే తెలిసింది. నా కెరీర్‌లో ఇంత వరకు సపోర్ట్‌ చేసిన ప్రేక్షకులు, ఇండిస్టీ ప్రముఖులందరికీ థ్యాంక్స్‌' అని హీరో అడివి శేష్‌ చెప్పారు.
మీనాక్షి చౌదరి మాట్లాడుతూ, 'ఇంత విజయాన్ని ఆస్వాదిస్తున్నందుకు ఎంతో సంతోషంగా ఉంది. నాకు ఈ అవకాశం ఇచ్చిన దర్శక, నిర్మాతలకు థ్యాంక్స్‌. ఇది నాకు ఎంతో ప్రత్యేకమైన సినిమా. నాకు బ్లాక్‌ బస్టర్‌ హిట్‌ లభించింది' అని తెలిపారు. 'నా నుంచి ఇంత మంచి పాటను రాబట్టుకున్న దర్శకుడు శైలేష్‌కు థ్యాంక్స్‌. అర్జున్‌ సర్కార్‌తో మూడో పార్ట్‌ మీద అంచనాలు పెంచేశారు. ఈ సిరీస్‌ తప్పకుండా గ్రాండ్‌ సక్సెస్‌ అవుతుందనే నమ్మకం ఇంకా బలపడింది' అని సంగీత దర్శకురాలు ఎంఎం శ్రీలేఖ తెలిపారు.
ఇంత మంచి విజయాన్ని అందించిన ప్రేక్షకులకు థ్యాంక్స్‌. మల్టీప్లెక్సుల్లోనే కాదు, సింగిల్‌ స్క్రీన్స్‌లోనూ క్లైమాక్స్‌లో కంటిన్యూగా అరుస్తూనే ఉన్నారు. సినిమా కోసం పని చేసిన అందరికీ థ్యాంక్స్‌. మ్యాక్స్‌ (పెట్‌) పుట్టినప్పటి నుంచి కూడా హిట్‌ కోసమే పెంచాం. ఎంతో బాగా నటించాడు. ఈ పెట్‌ను ఎంతో ప్రేమగా పెంచాం.
- డైరెక్టర్‌ శైలేష్‌ కొలను
