గతంలో బాలనటుడిగా, ఆ తర్వాత హీరోగా మెప్పించిన విశ్వ కార్తికేయ తాజాగా నటించిన సినిమా 'అల్లంత దూరాన'. ఇందులో ఆయనకు జోడీగా నటి ఆమని మేనకోడలు హ్రితిక శ్రీనివాస్‌ నటించింది.
చలపతి పువ్వల దర్శకత్వం వహించారు. ఆర్‌.ఆర్‌. క్రియేటివ్‌ కమర్షియల్‌ పతాకంపై కోమలి సమర్పణలో నిర్మాత ఎన్‌.చంద్రమోహన రెడ్డి తెలుగు, తమిళ భాషలలో నిర్మించారు. ఈ సినిమా అన్ని కార్యక్రమాలు పూర్తిచేసుకుని ఈనెల 10న విడుదలకు సిద్ధంగా ఉంది. ఈ సందర్భంగా నిర్మాత ఎన్‌.చంద్రమోహనరెడ్డి మాట్లాడుతూ, 'తెలుగులో విడుదల తర్వాత మంచి డేట్‌ చూసుకుని తమిళంలో కూడా ఈ సినిమాను విడుదల చేస్తాం. కథ,కథనాలకు అత్యంత ప్రాధాన్యమిస్తూ తీసిన సినిమా ఇది. హైదరాబాద్‌తో పాటు కార్వేటినగరం, పుత్తూరు, తిరుపతి, ఆర్‌.కె.వి.పేట, కేరళ, చెన్నై, పాండిచ్చేరి తదితర లొకేషన్లలో షూటింగ్‌ చేశాం. తెలుగుతో పాటు కొందరు ప్రముఖ తమిళ నటీనటులు కూడా ఇందులో నటించారు' అని చెప్పారు.
'ఇదొక ఫీల్‌ గుడ్‌ లవ్‌ స్టోరీ. చాలా క్వాలిటీగా చిత్రాన్ని తీశాం. నిర్మాత సంపూర్ణ సహకారంతోనే ఓ మంచి చిత్రాన్ని తీయగలిగాం. రాంబాబు సాహిత్యం, రధన్‌ సంగీతం అందరినీ హత్తుకునేలా చేస్తాయి. ఇప్పటికే పాటలు అందరినీ అలరింపజేస్తున్నాయి. కళ్యాణ్‌ ఛాయాగ్రహణం కనువిందు చేస్తుంది' అని దర్శకుడు చలపతి పువ్వల తెలిపారు.
హీరో విశ్వ కార్తికేయ మాట్లాడుతూ, 'ఇలాంటి మంచి చిత్రంలో నటించడం నా కెరీర్‌కు మంచి మలుపు అవుతుందని ఆశిస్తున్నాను. ఓ మంచి సినిమాతో ప్రేక్షకుల ముందుకు రాబోతున్నందుకు చాలా హ్యాపీగా ఉంది' అని అన్నారు.
భాగ్యరాజా, అలీ, ఆమని, తమిళ్‌ జేపీ, తులసి, జార్డమేరియన్‌, అప్పాజీ, అనంత్‌ , ఇళవరసన్‌, డానియెల్‌, స్వామినాథన్‌, కష్ణవేణి, నారాయణరావు, శివ తదితరులు నటించిన ఈ చిత్రానికి పాటలు: రాంబాబు గోశాల, ఎడిటింగ్‌: శివకిరణ్‌,
డాన్స్‌: గోపి, ఫైట్స్‌: నాభ, ఆర్ట్‌: చంద్రమౌలి, రచన-దర్శకత్వం: చలపతి పువ్వల.
