- కేరళతో హైదరాబాద్‌ ఢీ నేడు
గోవా : ఇండియన్‌ సూపర్‌ లీగ్‌ (ఐఎస్‌ఎల్‌) పాయింట్ల పట్టికలో అగ్రస్థానంపై కన్నేసిన హైదరాబాద్‌ ఎఫ్‌సీ నేడు బలమైన కేరళ ఎఫ్‌సీతో తలపడనుంది. గత ఎనిమిది మ్యాచుల్లో ఓటమెరుగని రికార్డు కొనసాగిస్తున్న హైదరాబాద్‌ ప్రస్తుతం 16 పాయింట్లతో రెండో స్థానంలో కొనసాగుతోంది. ఏటీకె మోహన్‌ భగన్‌తో మ్యాచ్‌ను డ్రా చేసుకున్న హైదరాబాద్‌ ఐఎస్‌ఎల్‌ చరిత్రలో తొలిసారి నం.1 స్థానం సాధించిన సంగతి తెలిసిందే. స్టార్‌ స్ట్రయికర్‌ ఓగ్బాచే అద్భుత ఫామ్‌లో ఉన్నాడు. ఐఎస్‌ఎల్‌లో అత్యధిక గోల్స్‌ చేసిన రికార్డు తన పేరిట నిలుపుకున్న ఓగ్బాచే నేడు కేరళతో మ్యాచ్‌లోనూ గోల్‌ పోస్ట్‌పై దాడి చేసేందుకు సంసిద్ధంగా ఉన్నాడు. దుర్బేధ్యమైన రక్షణ శ్రేణి ఈ సీజన్‌లో హైదరాబాద్‌ ఎఫ్‌సీని అత్యుత్తమ జట్టుగా నిలుపుతోంది. హైదరాబాద్‌పై ప్రత్యర్థి జట్లు కేవలం 9 గోల్స్‌ మాత్రమే చేశాయి. మరే జట్టు సైతం ఈ గణాంకాల్లో హైదరాబాద్‌కు దరిదాపుల్లో కూడా లేదు. కేరళ ఎఫ్‌సీ సైతం ఐఎస్‌ఎల్‌లో బలమైన జట్టు. అయినా, హైదరాబాద్‌ తాజా ఫామ్‌తో కేరళ ఓటమి నుంచి తప్పించుకునే వ్యూహంతో మ్యాచ్‌కు రానుంది. టాప్‌-4 స్థానాల కోసం పోటీ తీవ్రమవుతుండగా హైదరాబాద్‌, కేరళ మ్యాచ్‌ ఫలితం ఆసక్తి రేపుతోంది. హైదరాబాద్‌, కేరళ మ్యాచ్‌ నేడు రాత్రి 7.30 గంటలకు ఆరంభం కానుంది.