- గుజరాత్‌పై బెంగళూర్‌ గెలుపు
- ప్లే ఆఫ్స్‌ రేసులో ఆశలు సజీవం
ముంబయి : స్టార్‌ బ్యాటర్‌ విరాట్‌ కోహ్లి (73, 54 బంతుల్లో 8 ఫోర్లు, 2 సిక్స్‌లు) అర్థ సెంచరీతో కదం తొక్కాడు. తప్పక నెగ్గాల్సిన మ్యాచ్‌లో బెంగళూర్‌కు 8 వికెట్ల తేడాతో ఘన విజయాన్ని అందించాడు. 169 పరుగుల లక్ష్యాన్ని 18.4 ఓవర్లలోనే ఛేదించిన రాయల్‌ చాలెంజర్స్‌ బెంగళూర్‌ ప్లే ఆఫ్స్‌ రేసులో నిలిచింది. కెప్టెన్‌ డుప్లెసిస్‌ (44, 38 బంతుల్లో 5 ఫోర్లు)తో కలిసి కోహ్లి తొలి వికెట్‌కు 115 పరుగుల శతక భాగస్వామ్యం నమోదు చేశాడు. గ్లెన్‌ మాక్స్‌వెల్‌ (40 నాటౌట్‌, 18 బంతుల్లో 5 ఫోర్లు, 2 సిక్స్‌లు) ధనాధన్‌ ఇన్నింగ్స్‌తో మెరిశాడు. అంతకముందు, కెప్టెన్‌ హార్దిక్‌ పాండ్య (62 నాటౌట్‌, 47 బంతుల్లో 4 ఫోర్లు, 3 సిక్స్‌లు) అజేయ అర్థ సెంచరీతో గుజరాత్‌ టైటాన్స్‌ 168/5 పరుగులు చేసింది.
           16 పాయింట్లతో నాల్గో స్థానానికి ఎగబాకిన బెంగళూర్‌ ప్లే ఆఫ్స్‌ అవకాశాలు.. ముంబయి, ఢిల్లీ మ్యాచ్‌పై ఆధారపడి ఉన్నాయి. ముంబయిపై ఢిల్లీ నెగ్గితే బెంగళూర్‌ కథ ముగియనుంది. నెట్‌ రన్‌రేట్‌తో ఢిల్లీ క్యాపిటల్స్‌ టాప్‌-4లో నిలువనుంది. ముంబయి విజయం సాధిస్తే బెంగళూర్‌ దర్జాగా ప్లే ఆఫ్స్‌లో అడుగుపెట్టనుంది!.