- ఏడుగురు సజీవదహనం
లుథియానా: పంజాబ్‌లోని లుథియానాలో బుధవారం ఘోర అగ్ని ప్రమాదం జరిగింది. ఒకే కుటుంబానికి చెందిన ఏడుగురు సజీవ దహనమయ్యారు. వీరిలో ఐదుగురు చిన్నారులు ఉన్నారు. తెల్లవారుజామున 3 గంటల ప్రాంతంలో ఈ ప్రమాదం జరిగినట్టు పోలీసులు తెలిపారు. వివరాల ప్రకారం.. లుథియానాలోని తాజ్‌పూర్‌ రోడ్డులోని ఒక గుడిసెలో ఈ కుటుంబం నివసిస్తోంది. మంగళవారం రాత్రి వీరంతా నిద్రిస్తుండగా మంటలు చెలరేగాయని, ఈ ప్రమాదంలో భార్యభర్తలతోపాటు వారి నలుగురు కుమార్తెలు, ఏడాది వయసున్న కుమారుడు సజీవదహనమయ్యారు. వేరే ప్రాంతంలో నిద్రించడంతో మరో కుమారుడు రాజేశ్‌(17) ప్రాణాలు దక్కించుకున్నారు. సమాచారమందుకున్న అగ్నిమాపక సిబ్బంది ఘటనాస్థలికి చేరుకుని మంటలను అదుపు చేశారు. అయితే, అప్పటికే వీరంతా మరణించారని అగ్నిమాపక అధికారులు తెలిపారు. ప్రమాదానికి గల కారణాలు తెలియరాలేదన్నారు.