నవతెలంగాణ-హైదరాబాద్‌ : సోషల్‌ మీడియాలో సెలబ్రిటీల డీప్‌ఫేక్‌ వీడియోల వ్యవహారం కలకలం రేపుతోంది. తాజాగా జూనియర్‌ ఎన్టీఆర్‌, జాన్వీ కపూర్‌ నటించిన ‘దేవర’ సినిమాలోని ‘చుట్టమల్లె’ పాటకు సంబంధించిన ఓ ఏఐ మార్ఫింగ్‌ వీడియో వైరల్‌గా మారింది. దీనిపై ఎన్టీఆర్‌ తీవ్రంగా స్పందించారు. మహిళలను అవమానించేందుకు ఏఐని ఉపయోగించడం సిగ్గుచేటని మండిపడ్డారు. ఈ వీడియోను తయారు చేసిన వారితో పాటు సోషల్‌ మీడియాలో షేర్‌ చేస్తున్న వారిపైనా కఠిన చర్యలు తీసుకుంటామని హెచ్చరించారు.

మహిళలను గౌరవించడం మన సంస్కృతిలో భాగమని ఎన్టీఆర్‌ పేర్కొన్నారు. అలాంటి మహిళలను అవమానించేలా ఏఐ టెక్నాలజీని ఉపయోగించడం అత్యంత దారుణమని అన్నారు. ఈ మార్ఫింగ్‌ వీడియో వెనుక ఉన్న వారిని వదిలిపెట్టే ప్రసక్తే లేదని స్పష్టం చేశారు.

ఇలాంటి చెడు కంటెంట్‌ను ఎవరూ చూడొద్దని ఎన్టీఆర్‌ కోరారు. ఎవరూ ఫార్వర్డ్‌ చేయొద్దని సూచించారు. ఈ రోజు మరొకరికి ఎదురైన సమస్య రేపు మన ఇంట్లోని మహిళలకు కూడా రావచ్చని హెచ్చరించారు.

ఏఐ టెక్నాలజీని దుర్వినియోగం చేయకుండా కేంద్ర, రాష్ట్ర ప్రభుత్వాలు కఠిన నిబంధనలు తీసుకురావాలని ఎన్టీఆర్‌ కోరారు. ఆయన చేసిన ఈ పోస్ట్‌ ప్రస్తుతం సోషల్‌ మీడియాలో వైరల్‌గా మారింది. ఎన్టీఆర్‌ ఇంత తీవ్రంగా స్పందించడం ఇదే తొలిసారి అంటూ అభిమానులు చర్చించుకుంటున్నారు.