జాంబియాలో నల్గొండ వాసి దుర్మరణం..

నవతెలంగాణ-హైదరాబాద్‌ : నల్గొండ జిల్లాలో తీవ్ర విషాదం నెలకొంది. ఉపాధి నిమిత్తం ఆఫ్రికా దేశమైన జాంబియాకు వెళ్లిన ఓ వ్యక్తి, బోరు బావి తవ్వుతుండగా జరిగిన ప్రమాదంలో దుర్మరణం చెందాడు. ఈ వార్త తెలియడంతో మృతుడి కుటుంబ సభ్యులు, గ్రామస్థులు శోకసంద్రంలో మునిగిపోయారు.

నల్గొండ జిల్లా చిట్యాల మండలం ఉరుమడ్ల గ్రామానికి చెందిన జనపాల లింగస్వామి (50) గత కొన్నేళ్లుగా జాంబియాలో బోర్-రిగ్ కార్మికుడిగా పనిచేస్తూ కుటుంబాన్ని పోషిస్తున్నాడు. ఎప్పటిలాగే విధులకు వెళ్లిన అతడు, బోరు డ్రిల్లింగ్ పనులు నిర్వహిస్తుండగా ప్రమాదవశాత్తు అక్కడికక్కడే మృతి చెందినట్లు కుటుంబ సభ్యులకు సమాచారం అందింది.

లింగస్వామి మరణవార్తతో ఉరుమడ్ల గ్రామంలో విషాద ఛాయలు అలుముకున్నాయి. అతడికి ఇద్దరు కుమారులు కాగా, వారిలో ఒకరు గతేడాదే మృతి చెందాడు. ఇప్పుడు ఇంటికి పెద్దదిక్కుగా ఉన్న లింగస్వామిని కూడా కోల్పోవడంతో ఆ కుటుంబం కన్నీరుమున్నీరుగా విలపిస్తోంది. తమ గ్రామం నుంచి ఎంతోమంది జీవనోపాధి కోసం విదేశాలకు వెళుతున్నారని, ఇటువంటి ప్రమాదాలు సంభవించినప్పుడు ఆయా కుటుంబాలు వీధిన పడుతున్నాయని గ్రామస్థులు ఆవేదన వ్యక్తం చేశారు. విదేశాల్లో మరణించిన వలస కార్మికుల కుటుంబాలను ప్రభుత్వం ఆదుకోవాలని వారు విజ్ఞప్తి చేశారు.