ఎలన్‌ మస్క్‌ మళ్లీ గురి!
స్టార్‌లింక్‌ సేవలకు అనుమతిలో జాప్యంపై ఆగ్రహం
‘భారత్‌లో అసలైన అధికారం అంబానీదేనా?’ అంటూ తీవ్ర అసహనం
గుత్తాధిపత్యాన్ని కొనసాగించేందుకే జాప్యమని విమర్శ
భద్రతా అనుమతులు ఇంకా పెండింగ్‌లోనే..
నిబంధనలన్నీ సమానమేనంటున్న కేంద్ర ప్రభుత్వం
న్యూఢిల్లీ : భారత్‌లో తన ఉపగ్రహ ఇంటర్నెట్‌ సేవల సంస్థ స్టార్‌లింక్‌ కార్యకలాపాలు ప్రారంభించేందుకు అనుమతులు రావడంలో జాప్యం జరుగుతుండటంపై టెస్లా అధినేత, స్టార్‌లింక్‌ వ్యవస్థాపకుడు ఎలన్‌ మస్క్‌ మరోసారి తీవ్ర అసహనం వ్యక్తం చేశారు. ‘భారత్‌లో అసలైన అధికారం అంబానీదే’ అంటూ రిలయన్స్ అధినేత ముఖేశ్‌ అంబానీని లక్ష్యంగా చేసుకుని చేసిన వ్యాఖ్యలకు కొనసాగింపుగా.. ‘ప్రియమైన ప్రధాని అంబానీ’ అంటూ వ్యంగ్యాస్త్రాలు విసిరారు. దేశంలో గుత్తాధిపత్యాన్ని కొనసాగించేందుకే స్టార్‌లింక్‌కు పోటీ చేసే అవకాశం ఇవ్వడం లేదని ఆరోపించారు. అయితే, స్టార్‌లింక్‌ సేవలకు అవసరమైన భద్రతా అనుమతుల ప్రక్రియ ఇంకా కొనసాగుతోందని కేంద్ర ప్రభుత్వం స్పష్టం చేసింది. అన్ని సంస్థల విషయంలోనూ ఒకే విధమైన నిబంధనలు అమలవుతున్నాయని వివరించింది.
‘ప్రజల ప్రయోజనాల కోసం పోటీకి అనుమతించండి’
సామాజిక మాధ్యమం ఎక్స్‌లో స్పందించిన మస్క్‌.. ‘‘ప్రియమైన ప్రధాని అంబానీ.. మీరే భారత్‌కు అసలైన అధిపతి అన్న విషయాన్ని గుర్తించలేకపోయినందుకు నా వినయపూర్వక క్షమాపణలు. దేశ ప్రజలను గుత్తాధిపత్యంతో దోచుకోవడాన్ని కొనసాగించాలనుకోవడం సహజమే. అయినప్పటికీ స్టార్‌లింక్‌ను పోటీ పడేందుకు అనుమతిస్తారా?’’ అంటూ వ్యంగ్యంగా వ్యాఖ్యానించారు. భారత్‌తోపాటు అనేక దేశాల్లో ఇప్పటికీ ఇంటర్నెట్‌ సదుపాయం లేని ప్రాంతాలు ఉన్నాయని మస్క్‌ పేర్కొన్నారు. ఇంటర్నెట్‌ లేకపోవడంతో పిల్లలు విద్యా అవకాశాలను కోల్పోతున్నారనీ, చిన్న వ్యాపారులు తమ ఉత్పత్తులను ప్రపంచ మార్కెట్‌లో విక్రయించే అవకాశం పొందలేకపోతున్నారని వివరించారు.
‘కొంతమంది కుబేరులే అడ్డుకుంటున్నారు’
ఈ వారం ప్రారంభంలోనూ మస్క్‌ ఇదే అంశంపై స్పందించారు. భారత్‌లో కొంతమంది సంపన్న వ్యాపారవేత్తలు స్టార్‌లింక్‌ ప్రవేశాన్ని అడ్డుకుంటున్నారని ఆరోపించారు. ఈ జాప్యాన్ని భారత ప్రజలకు జరుగుతున్న అన్యాయంగా అభివర్ణించారు. అయితే, ఎవరిని ఉద్దేశించి ఈ వ్యాఖ్యలు చేశారో ఆయన స్పష్టంగా పేర్కొనలేదు. అయితే మస్క్‌ ఆరోపణలపై కేంద్ర కమ్యూనికేషన్ల మంత్రిత్వ శాఖ స్పందించింది. ఉపగ్రహ సమాచార సేవలతో సహా అన్ని టెలికాం సేవలకు న్యాయమైన, వివక్షకు తావులేని అనుమతుల విధానం అమల్లో ఉందని గురువారం వెల్లడించింది. లైసెన్సులు పొందిన సంస్థలు వినియోగదారుల భద్రత, సమాచార రక్షణకు సంబంధించిన నిబంధనలను పాటించాల్సి ఉంటుందని తెలిపింది.
పోటీలో జియో, వన్‌వెబ్‌, అమెజాన్‌
భారత్‌లో ఉపగ్రహ ఆధారిత సమాచార సేవలు ప్రారంభించేందుకు అవసరమైన జీఎంపీసీఎస్‌ లైసెన్సు, ఇతర చట్టబద్ధ అనుమతుల్లో కొన్నింటిని స్టార్‌లింక్‌ ఇప్పటికే పొందింది. భారతీ గ్రూప్‌ మద్దతున్న యూటెల్‌శాట్‌ వన్‌వెబ్‌, రిలయన్స్ జియో ప్లాట్‌ఫామ్స్‌కు చెందిన జియో శాటిలైట్‌ కమ్యూనికేషన్స్‌ కూడా ఈ రంగంలో ఉన్నాయి. జెఫ్‌ బెజోస్‌కు చెందిన అమెజాన్‌ లియో సైతం లైసెన్సు కోసం ప్రయత్నిస్తోంది. కాగా ఒకవైపు విదేశీ సంస్థల ప్రవేశంపై అనిశ్చితి.. మరోవైపు దేశీయ సంస్థల పోటీ.. ఈ నేపథ్యంలో స్టార్‌లింక్‌ అనుమతుల వ్యవహారం ప్రాధాన్యం సంతరించుకుంది. ఈ జాప్యం వెనుక గుత్తాధిపత్య ప్రయోజనాలున్నాయన్న మస్క్‌ ఆరోపణలను కేంద్రం తోసిపుచ్చుతున్నప్పటికీ.. భారత్‌లో ఉపగ్రహ ఇంటర్నెట్‌ సేవల రంగంలో పోటీ ఎలా ఉండబోతోందన్న చర్చకు ఈ వివాదం తెరలేపింది.
బీజేపీకి రూ. 385 కోట్ల రిలయన్స్ ఎన్నికల బాండ్లు
2022లో అల్‌ జజీరా ప్రచురించిన కథనం, 2024 నాటి ఇండియన్‌ ఎక్స్‌ప్రెస్‌ నివేదికకు సంబంధించిన వివరాలను అందులో ప్రస్తావించారు. క్విక్‌ సప్లై అనే రిలయన్స్ అనుబంధ సంస్థ ఎన్నికల బాండ్ల ద్వారా బీజేపీకి రూ.385 కోట్లు, శివసేనకు రూ.25 కోట్లు విరాళంగా ఇచ్చినట్లు ఆ నివేదిక పేర్కొంది. మస్క్‌ ఆరోపణలపై రిలయన్స్ ఇప్పటి వరకు స్పందించలేదు.
కామెంట్‌లు (0)