ప్రతి ఒక్కరి ఇంట్లో ఉండే పదార్థాల్లో పల్లీలు ఒకటి. పల్లీలను చట్నీలు, పొడులు, స్వీట్లు ఇలా అనేక వంటకాల్లో వాడుతారు. అయితే చాలా మంది పల్లీలు తింటే కొలెస్ట్రాల్ పెరుగుతుందని అనుకుంటారు. కానీ ఇది పూర్తిగా నిజం కాదు. వీటిలో మన శరీరానికి ఉపయోగపడే ఆరోగ్యకరమైన కొవ్వులు ఉంటాయి. ముఖ్యంగా మోనోఅన్‌శాచురేటెడ్ (MUFA), పాలీఅన్‌శాచురేటెడ్ (PUFA) ఫ్యాట్స్ ఉండటం వల్ల ఇవి గుండె ఆరోగ్యానికి మేలు చేస్తాయి.
ఈ మంచి కొవ్వులు రక్తంలో చెడు కొలెస్ట్రాల్ (LDL) ను తగ్గించి, మంచి కొలెస్ట్రాల్ (HDL) ను పెంచడంలో సహాయపడతాయి. అంతేకాకుండా వేరుశెనగలలో ప్లాంట్ స్టెరాల్స్ అనే పదార్థాలు ఉంటాయి. ఇవి మనం తీసుకునే కొలెస్ట్రాల్‌ను శరీరం గ్రహించకుండా అడ్డుకుంటాయి. దీనివల్ల రక్తనాళాలు మూసుకుపోవడం, గుండె జబ్బులు వచ్చే ప్రమాదం తగ్గుతుంది.
పల్లీలలో రెస్వెరాట్రాల్ అనే యాంటీఆక్సిడెంట్ కూడా ఉంటుంది. ఇది రక్తనాళాలను ఆరోగ్యంగా ఉంచి, రక్తం సజావుగా ప్రవహించేలా చేస్తుంది. అలాగే ఒలిక్ ఆమ్లం ఉండటం వల్ల ఇది ఆలివ్ ఆయిల్‌లా గుండెకు మేలు చేస్తుంది. ఇంకా ఆర్జినైన్ అనే అమైనో ఆమ్లం రక్తనాళాలను విస్తరింపజేసి రక్త ప్రసరణను మెరుగుపరుస్తుంది.
పోషకాల పరంగా చూస్తే, వేరుశెనగలలో మెగ్నీషియం, పొటాషియం, రాగి వంటి ఖనిజాలు ఎక్కువగా ఉంటాయి. ఇవి రక్తపోటును నియంత్రించడంలో సహాయపడతాయి. అలాగే విటమిన్ E, మాంగనీస్ వంటి యాంటీఆక్సిడెంట్లు శరీర కణాలను రక్షిస్తాయి. వేరుశెనగల ఎర్రటి పైపొరలో కూడా శక్తివంతమైన యాంటీఆక్సిడెంట్లు ఉంటాయి. అందుకే వీటిని పొట్టు తీసేయకుండా తినడం మంచిది.
అయితే వీటిని ఎలా తింటున్నామనేది కూడా చాలా ముఖ్యం. ఎక్కువ నూనెలో వేయించినవి లేదా ఎక్కువ ఉప్పు వేసినవి తినడం ఆరోగ్యానికి మంచిది కాదు. ఇవి రక్తపోటు పెరగడానికి కారణమవుతాయి. కాబట్టి ఉడికించిన లేదా లైట్‌గా వేయించిన వేరుశెనగలు తినడం ఉత్తమం. రోజుకు సుమారు గుప్పెడు (25-30 గ్రాములు) వేరుశెనగలు తింటే సరిపోతుంది.
కామెంట్‌లు (0)