మా రాతలను మీరెలా నిర్దేశిస్తారు ?

ట్రంప్‌ చర్యపై ప్రధాన టీవీ నెట్‌వర్క్‌ల ఆగ్రహం
అధ్యక్షభవనం ప్రసారాల నిలిపివేత
వాషింగ్టన్‌ : అమెరికా అధ్యక్షభవనంలోకి సీఎన్‌ఎన్‌, పొలిటికో, ఎంఎస్‌ నౌ వార్తా సంస్థల ప్రవేశాన్ని నిషేధించడంపై ప్రధాన మీడియా హౌస్‌లు మండిపడ్డాయి. శ్వేతసౌధం చర్యను నిరసిస్తూ దేశాధ్యక్షుడు డొనాల్డ్‌ ట్రంప్‌కు సంబంధించిన అన్ని ప్రసారాలను నిలిపివేశాయి. పత్రికలు ఏం రాయాలో ప్రభుత్వం ఎలా నిర్ణయిస్తుందని నిలదీశాయి. న్యూయార్క్‌ టైమ్స్‌, వాషింగ్టన్‌ పోస్ట్‌ వంటి కొన్ని సంస్థలు ట్రంప్‌ కార్యక్రమాలకు సంబంధించిన చిత్రాలను ప్రచురించబోమని స్పష్టం చేశాయి. ప్రధాన మీడియా సంస్థల నిర్ణయంతో...ట్రంప్‌ ఎయిర్‌ఫోర్స్‌ వన్‌ విమానం ఎక్కడం, ఐరాస సర్వసభ్య సమావేశం కోసం న్యూయార్క్‌ చేరుకోవడం వంటి అంశాలేవీ నెట్‌వర్క్‌ టీవీలో ప్రసారం కాలేదు. శ్వేతసౌధం సౌత్‌ లాన్‌లో కొత్త మెరైన్‌ వన్‌ హెలిప్యాడ్‌ కోసం జరిగిన రిబ్బన్‌ కటింగ్‌ కార్యక్రమంలో ట్రంప్‌ పాల్గన్నారు. ఈ కార్యక్రమం అధ్యక్షభవనం వెబ్‌సైటులో ప్రత్యక్ష ప్రసారం అయినప్పటికీ ట్రంప్‌ వ్యాఖ్యలేవీ వినిపించలేదు. న్యూయార్క్‌ మేయర్‌ జోహ్రాన్‌ మమ్దానీతో సమావేశం అనంతరం ట్రంప్‌ టీవీలో కన్పించారు. విలేకరుల సమావేశానికి మీడియా సభ్యులను ఆహ్వానిస్తున్నానని ట్రంప్‌కు మమ్దానీ తెలియజేశారు. అప్పుడు ట్రంప్‌ 'ఇది చాలా ఆసక్తికరంగా ఉంది. ఎందుకంటే వారు నన్ను బహిష్కరిస్తామని చెప్పారు. అయితే వారు నన్ను ఎప్పుడూ బహిష్కరించలేదు. కాబట్టి నేను పెద్దగా ఆందోళన చెందడం లేదు' అని అన్నారు.