నవ్వుల్‌ పువ్వుల్‌

డాక్టర్ - పేషెంట్

డాక్టర్: మీకు రోజుకు ఎన్ని లీటర్ల నీళ్లు తాగాలని చెప్పాను?

పేషెంట్: నాలుగు లీటర్లు డాక్టర్.

డాక్టర్: మరి నేను పరీక్షించి చూస్తే కేవలం ఒక్క లీటరే తాగుతున్నట్లు ఉంది?

పేషెంట్: డాక్టర్ గారూ.. ఆ మిగతా మూడు లీటర్లు నాకు ఎక్కడం లేదు!

నచ్చిన ఊరు

భర్త : భార్యని పోచంపల్లి, ధర్మవరం, ఉప్పాడ ఈ మూడింటిలో నీకేది ఇష్టం?

భార్య : మూడూ ఇష్టమే! మూడు చీరలూ కొనిచ్చెయ్యండి.

భర్త : చీరలా? చీరలేమిటి? నేను చెప్పినది ఊళ్ల పేర్లు! మా ఆఫీసు వాళ్ళు నన్ను ట్రాన్స్ఫర్ చేస్తూ, ఈ మూడు ఊళ్ళల్లో ఒకటి కోరుకొమ్మన్నారు. నీ అభిప్రాయం కూడా అడగాలి కదా అని అడిగా.

రుణాలు

ఓ రాజకీయ నాయకుడు (సభ ముగిసేక) : ఏంటోయ్ సెక్రటరీ వీళ్ళంతా నా వెనకబడ్డారు?

సెక్రటరీ: వెనుక బడిన వాళ్ళందరికీ ఋణాలిప్పిస్తానని ఇప్పుడు మీరే కద సర్ చెప్పేరు. అందుకని.....

తల వంపులు

తండ్రి (కొడుకుతో): నీ ప్రవర్తనవల్ల నాకెంత తలవంపుగా ఉందో తెలుసా?

కొడుకు: లేదు నాన్నా! నీ తల బాగానే ఉంది. వంపుగా లేదు

దాటి వస్తున్నా...

ఒక వ్యక్తి: ఇంకెప్పుడూ నా గుమ్మం తొక్కొద్దని చెప్పలేదూ నీకు?

రెండో వ్యక్తి: అందుకే గుమ్మం తొక్కకుండా దాటి వస్తున్నాను