నవతెలంగాణ - హైదరాబాద్ : ఉక్రెయిన్‌పై రష్యా మరోసారి డ్రోన్ దాడులకు పాల్పడింది. గురువారం ఉదయం నిప్రో నగరంలోని ప్రధాన రైల్వే స్టేషన్‌ను లక్ష్యంగా చేసుకుని జెట్‌ పవర్డ్‌ డ్రోన్‌తో దాడి చేసింది. ఈ ఘటనలో కనీసం 14 మంది మృతి చెందగా, మరో 14 మంది తీవ్రంగా గాయపడ్డారు. దేశవ్యాప్తంగా జరిగిన ఇతర దాడులతో కలిపి మృతుల సంఖ్య 20 దాటింది. జపోరిజియా వెళ్లే ప్యాసింజర్ రైలు, మరో కమ్యూటర్ రైలు ప్లాట్‌ఫామ్‌పై ఉన్న సమయంలో ఈ దాడి జరిగింది. మృతుల్లో 11 ఏళ్ల బాలుడు కూడా ఉన్నట్లు ప్రాంతీయ గవర్నర్ ఒలెక్సాండర్ హంజా తెలిపారు. చెర్నిహివ్‌లో జరిగిన దాడిలో ఇద్దరు బాలికలు, క్రెమెన్‌చుక్‌లో ముగ్గురు మరణించారు. దేశవ్యాప్తంగా 50 మందికి పైగా గాయపడినట్లు సమాచారం. ఈ దాడిని ఉక్రెయిన్ అధ్యక్షుడు జెలెన్‌స్కీ తీవ్రంగా ఖండించారు. పౌరులు ప్రయాణించే రైల్వే స్టేషన్‌ను లక్ష్యంగా చేసుకోవడంపై ఆగ్రహం వ్యక్తం చేస్తూ, రష్యాపై కఠిన ఆంక్షలు విధించాలని అమెరికా, ఐరోపా దేశాలను కోరారు. అయితే పౌరులను లక్ష్యంగా చేసుకోలేదని రష్యా వాదిస్తోంది.